حافظ محمدبن میمون رحمہ اللہ گوشیت: امام ابوحنیفہ رحمہ اللہ ءِ زمانَگا ھِچ کسے داناتِر، پرھیزگارتِر، درویش تِر، عارف تِر و فقیہ تِر چہ آئیا نبیتَگ، اللہ پاکَے سرا سوگَنداِنت اگہ آئیا مَنا صد ھزار دینار بداتیں مَنا اِنچو دوست نبوت کہ چہ آئیا حَدیثے بہ اِشکُناں و چہ آئی دیوانا بھرہ مَند بباں. ابراھیم […]

حافظ محمدبن میمون رحمہ اللہ گوشیت: امام ابوحنیفہ رحمہ اللہ ءِ زمانَگا ھِچ کسے داناتِر، پرھیزگارتِر، درویش تِر، عارف تِر و فقیہ تِر چہ آئیا نبیتَگ، اللہ پاکَے سرا سوگَنداِنت اگہ آئیا مَنا صد ھزار دینار بداتیں مَنا اِنچو دوست نبوت کہ چہ آئیا حَدیثے بہ اِشکُناں و چہ آئی دیوانا بھرہ مَند بباں.
ابراھیم بن معاویۃ الضریر رحمہ اللہ گوشیت: امام ابوحنیفہ رحمہ اللہ ءِ دوست دارَگ سُنَّتَے تَمام کَنوک اِنت. امام صاحب اَت کہ عدالتا تعریفی کُت و وت ھم گَپ و کِردارَے توکا عادل اَت، امام صاحب اَت کہ علمَے مادنیں راھَے پہ مردماں پَدَّر کُت و علمَے مُشکلاتَے روشن کَنائینتَنت.

اسد بن حکیم رحمہ اللہ گوشیت: اَبَید جاھل و بدعتی مردماں دگہ ھِچ کسے پہ امام رحمه الله ءِ بَد گوشتِنا زُبانَ تاب ندات.

ابو سلیمان رحمہ اللہ گوشیت: امام ابوحنیفہ رحمہ اللہ چہ عجیبا ھم عجیب تِر بیتَگ، چه امام رحمہ اللہ ءِ گَپا ھما مردمے دیم گِیرت کہ چہ آئی گپَے فھمَگا عاجز ببیت.

ابوعاصم رحمہ اللہ گوشیت: اللہ پاکَے سَوگنداِنت کہ مَنی نَزّا امام رحمه الله چہ ابن جریح ھم فقیہ تِراِنت، منی چماں فِقھَے پِڑا چہ امام صاحبا گھتریں نَدیتَّگ.

داود طائی رحمہ اللہ ءِ دیوانا امام صاحبَے یاد کَنَک بوت، گوشتی: آ ھما استاراِنت کہ چہ آئیا راہ شوھاز کَنَگ بیت، علمے اِنت کہ مومنانی دل آئیا مَنّیت.

خلف بن ایوب رحمہ اللہ گوشیت: علم چہ رب العالمینَے نیمَگا پہ رسول اللہ صلی اللہ علیہ و سلم سربوتَگ و چہ آئیا پہ آئی دوستان و چہ آئی دوستاں پہ تابعین و رندا پہ امام ابوحنیفہ رحمہ اللہ و آئی دوستاں سربیتَگ ھر کسا اے گپ وش بیت چہ گھتِر و ھَر کَسا وش نبیت مَبیت.

پہ یکے چہ اماماں گوشَگ بوت: چیا وھدے کہ امام ابوحنیفہ رحمہ اللہ ءِ نام گِرَگ بیت شما آئی سَتایا کَنِت بلے وھدے کہ چہ دگراں یادے کَنَگ بیت شما آیانی سَتا کَنَگَے واستا چیزے نہ گوشِت؟ گوشتی: امام رحمہ اللہءِ جاگاہ چہ اِشی کہ مردماں چہ آئی علم و زانتا سوبمند بیتَگَنت سَک بُرزاِنت کہ دگراں پہ آ جاھا سَر نبیتَگَنت، اے بابتا من خاص آئی تعریفا کَناں داں مَردم گیشتر پہ آئی نیکیں دعا بِکَننت.

سرچَمَّگ:الخیرات الحسان فی مناقب الامام الاعظم ابی حنیفہ النعمان