سنت آنلاین

واجه مولانا عبدالکریم حسین‌پور/راجی، و گُشتَے جمعهَے بیان

 بایدانت بلوچ راجَے شرف سمبالگ ببیت و کُشوکاں وتی کارانی پسوا به دینت
واجه مولانا سید عبدالکریم حسین‌پور/راجی شهر گُشتَے جمعهَے پیش امام و بلوچی زبان و ادبَے شهزانتا مرچیگیں جمعهَے
(۸ اسفند ۱۳۹۹هجری شمسیا) شمسَرَے سیمسرَے بابتا گوشت: کُشتارے که ماں سیمسرا انجام گپتگ شرّیں کارے نهَت، حکومتے که پتَے جاها اِنت بایدانت مئی هیالداریا بکنت، نه که ما را بِجَنت و نابود بکنت؛ بهر حال ردی یے پیش آتکگ ، بلے آ چیزے که اے دیارَے عالمانی واهگ انت، اش اِنت که: ما بایدانت وتی آرامیا حفظ بکنیں و چه قانونَے رهبندا اے مسئله یاں رندگیری بکنیں.

گُشتَے امام جُمعَها اے بابتا که دولتمرداں په مردماں کار جوڑ بکننت تاکید کت و گوشتی: دولتَے وظیفه اش انت که په بے کاریں مردماں کار شوهاز بکنت، داں اے چیزانی پدا مه رونت، حتی سیمسراں قانونی بکنت و چه قانونَے نیمگا اجازت بدنت که اے ورنا په وتا کار بکننت.
ماں کشورَے هنوگیں جاورا اگه اے مرز مبوتیں، مردم چه لاچاریا دُزے پدا شُتنت و یا که کُشت و کوشَے رندا اَتنت. پروردگارا شکرانت که هَمِدا سرگرم بوتگنت و اے رَدیں کارانی پدا نکپتگنت.
مئی واهگ چه دولتا اش انت که: په اے ورنایاں کار جوڑ بکنت و اے دولتَے وظیفه انت. کار جوڑ بکنت و بگوشیت: برابر گوں اے کانودا کار بکن اِت اگه آ وهدی سلکاری اِش کت گوں آیاں به مِڑیت.
بلے وهدے که ورنایے جَن و چُکّی هست و چیزے نداریت و یا ورنایے که لوٹیت سیر و عاروس بکنت و چیزے نداریت، چے بکنت؛ لاچار اِنت که اے کاران بکنت؛ اے بابتا لازم انت که دولت وتی وظيفهانی سرا عمل بکنت و په لس مخلوقا کار جوڑ بکنت داں اے کارانی پدا مَرَونت.
اے بابتا چه شریعتَے نیمگا هر وڑیں ناحقیں کُشتار محکوم انت، اگر قتل حقینے ببیت آ وتی جاها اِنت؛ البت اودا هم بایدانت قاضی دستور بدنت نه که هر کسے وت سرا قتل بکنت؛ چیا که اودا بازیں پیشامد جوڑ بنت.

همے وڑا واجه مولانا حسین‌پور/راجی چه بلوچستانَے مردمانی وفاداریا تران کُت و گوشتی: من نظام جمهوری اسلامیا گوشاں که بلوچستانَے مردماں، انقلابَے چِل دو و یا چِلّ سالگیں سِندا وفادارتريں مردم بیتگنت و هر جاه ماں کشورا زهرشانی و زرمبش پیداگ بیتگ، بلوچستانا نبیتگ؛ اے بابتا بایدانت بلوچ راجَے شرف برابر گوں آ چیزے که آیانی جاه و مقام انت و دولتَے شان انت، سمبالگ ببیت. کسانے که شهید کنگ بیتگنت و یا که ٹپیگ بوتگنت، بایدانت که جنوکاں پسو به دَیَنت.