واجهَے نسب: سید محمد یوسف حسین پور ولد سید محمد کریم ولد شهید سید ملا غلام محمد ولد سید محمد نور انت، اے قومداں مُلکَے تها په سادات حسینی مشهور انت. اے خاندانَےبزرگاں مدام په مردمانی دعوت و اصلاحا گُلائیش بوتگنت، اے مردمانی ترپوکتریں استال مولانا سید عبدالواحد شاه گُشتی رحمه الله بوتگ که په […]

واجهَے نسب:
سید محمد یوسف حسین پور ولد سید محمد کریم ولد شهید سید ملا غلام محمد ولد سید محمد نور انت، اے قومداں مُلکَے تها په سادات حسینی مشهور انت.
اے خاندانَےبزرگاں مدام په مردمانی دعوت و اصلاحا گُلائیش بوتگنت، اے مردمانی ترپوکتریں استال مولانا سید عبدالواحد شاه گُشتی رحمه الله بوتگ که په حضرت صاحب، نامانی انت، اے واجه شهید ملّا سید غلام محمدَے چُک انت و نمیرانیں شیخ الحدیثَے ناکو انت.

ودی بوتِنَے درگت

واجه شیخ الحدیث رحمه الله ماں اسلامی تاریخِ ۱۳۴۹ هجری قمریّا و برابر گوں ۱۳۰۹شمسیّا ماں گُشتَے سرڈگارا چه ماتا بوتگ، هنگتا په نوک ورنائیا سر نبوتگت که واجهَے پت نمیران بیت و هنگتا دو سال چه اےگپا نگوستگت که چه ماتَے مِهرا هم زبهر بیت، چورئی یَے رنج و غماں گوں هوار بیت، واجهَے وتی گپ انت که گوشیت: منا وتی مات بس همنچو یادا انت که په منا نیکیں دعا کنگا اَت و وتی ماتَے دعایانی اثر من وتی زندا مارگایاں.
رندا شیخ الحدیثَے رودینگَے زحمت آئی ناکو حضرت صاحبا زُرت،
هما چُکّے وهدا نیک بختے چیدگ آئی دیما ترپوک اَت.

واجهَے بنگیجی وانگ

ابتدایی درساں واجها داں چار کلاسا ونتنت، ماں ۱۳۵۸( ه ق) سالا وهدے که گُشتی دینی وانگجاهَے بُن هِشت گوں آئی ناکویَے (حضرت صاحبَے) مزن هِمّتیا ایر کنگ بوت، شیخ الحدیث همے وانگجاها پترت، آئیا وتی مقدماتی درس داں کنزالدقائق و کافیه، وتی ناکو گورا ونت و آسر کُتنت.

علمَے شوهازگ ڈنّ چه وتی شهرا

مرحوم شیخ الحدیث وتی ناکو یَےشَور و صلاحا پَد په علمَے شوهاز کنگا دیم په پاکستان_ که نوک جدا بوتگت_شُت.
اول سرا داں سالے ماں دارالهُدی’ٹیڈی یَے دینی زانتجاها مَنت بلے وهدے که سرپَد بوت پاکستانَے عالِماں دگه دینی وانگجاهے بَستَگ که دیوبندَے درور انت و ماں ٹنڈو اللهیارَے شهرا اِنت و نامی هم دارالعلوم انت و لهتے چه هِندَے زَبَر دستیں عالماں هم اودا اَنت، شیخ الحدیث دیم په هما وانگجاها رهادَگ بوت و داں سَے سالا چه اودَے اُستاداں سوبمندی کٹّ اِت.
و ماں ۱۳۷۳ هجری قمریّا دیم په قاسم العلوم مُلتانا شُت و دورۂ حدیثی همودا ونت، اے وهدا واجه مولانا موسی’ خان بازی گوں شیخ الحدیثا هم کلاس اَت که درائیں دوره حدیثَے طالب ۲۷دانگت انت.
نمیرانیں شیخ الحدیثا ماں ۱۳۷۴ هجری قمریّا تخصص فی الحدیثَے دوره ماں جامعة العلوم الاسلامیة نیوٹاون کراچیّا(که همے سالا جوڑ کنگ بوتگت) وَنت و همے دَورانا مدرسهَے داخلی کار وبارانی ذمّه واراَت.
تفسیرَے درس هم واجها چه قرآنَے مزنیں گیشوار کنوک بزاں واجه مولانا عبدالله درخواستی رحمه اللهَے نیمگا دربُرت_واجه درخواستی مولانا حسین علی رحمه اللهَے خاصیں شاگرد اِنت_

واجهَے مشهوریں استاداں

۱_مولانا سید عبدالواحد گُشتی، مشهور په حضرت صاحب.
۲_شیخ التفسیر مولانا عبدالله درخواستی
۳_محدث العصر علامه سید محمد یوسف حسینی بنوری.
۴_شیخ الحدیث مولانا عبدالخالق ملتانی.
۵_مولانا مفتی محمود.
۶_مولانا بدرعالم میرتهی.
۷_مولانا عبدالرشید نعمانی
۸_مولانا مفتی اشفاق الرحمان کاندهلوی.
۹_مولانا عبدالحق نافع.
۱۰_مولانا عبدالعزیز کاملپوری.

شیخ الحدیثَے دینی و چاگردی کار و بارانی سرا چمشانکے

مرحوم حضرت صاحب پیسر چه اِشی که حق آباد بِرَوت، ماں نمدی یے شیخ الحدیثا دستور دنت که رند چه درسانی هلاس کنگا هما دمانا په گُشت واترّ بِکنت.
شیخ الحدیث ناکویَے گپّا زوریت و چه مولانا بنّوری په مُلکَے واترّ کنگا اجازت لوٹیت، مولانا بنّوری وهدے که واجهَے علمی استعداد و خدا دادی امتیازاں ماں وتی شاگردَے زِردا گندیت، گوشیت: یوسف! هَمِدا بِنِند! شیخ الحدیث وتی ناکویَے نمدے شکسگَے جریانا دیما کاریت، بزرگ مردیں استاد گوں لاچاریں دلے وتی شاگِردا رُکسَتَ کَنت و گوشیت: دگرانی چُکّا کَس په نِندَگا لاچار کُت نَکَنت.
وهدے که شیخ الحدیث په گُشت سربیت، حضرت صاحب مَسیت و مدرسهَے مستریّا شیخ الحدیث دنت و وت په حق آبادا هجرت کنت.
شیخ الحدیث هما اول سرا وتی کاراں په دل گوں حضرت صاحب و مولانا بنّوری یَے رهشونیّا بُندات کنت، دینی وانگجاها گیش چه گیشا دیما بارت داں جاهے که آ زمانگا ماں بلوچستانا آباد تِریں مدرسه یاد و بود کَنَگ بیت.

مولانا حسین پور رحمه الله هما کس انت که بلوچستانَے تها بخاری یَے ختمَے دیوانَے اوّلی گروک زانگ بیت، عین العلوم گُشتَے اولی پاگ بندی یَے دیوان ماں ۱۳۹۰هجری قمریّ سالا گوں بلوچستانَے زَبَر دَست تِریں عالِمانی هُوریّا چُش که: واجه مولانا عبدالواحد گُشتی، مولانا عبدالعزیز ملازاده، مولانا محمد شهداد سراوانی، مولانا عبدالعزیز ساداتی، مولانا قمرالدین ملازئی، مولانا محمد عمرسربازی، مولانا محمد ابراهیم دامنی، مولانا نظر محمد دیدگاه و… برجَم دارگ بیت که وتی وهدا بے مٹّ و دروریں دیوانے ات و بلکیں رند چه صفوی یَےحکومتا په اهلسنتَے دینی طالباں اول تریں جشنے ات که ماں ایرانا گِرَگ بوتَگ

همے وڑا شیخ الحدیث هما کس انت که واجها شورای هماهنگی مدارس دینی اهل سنت، ماں سیستان و بلوچستانَے اُستانا بُنگیج کنائینتگ و ماں وتی زندا اے شَورایَے پاگواجه هم بوتگ، شَورا یَے اولی دیوان گوں همے واجهَے سرمستریّا ماں عین العلوم گُشتا گوں اُستانَے عالِمانی هوریّا گِرَگ بوتگ.

همے وڑا شیخ الحدیث واجه مولانا عبدالعزیز ملازادهَے خاصّیں مشاور ماں مذهبی و چاگردی و سیاسی کاراں بوتگ، و ایرانَے بنیادی قانونَے جوڑ کنگَے وهدا ۴داں ۵ ماها گوں واجه ملازاده هور و همراه بوتَگ.

همے وڑا شیخ الحدیث رحمه الله ءِ گیشتریں وهد ماں چاگردی/اجتماعی کار و باراں، مردمانی گندک و دیدارا، قومی جیڑه یانی حلّ کنگا، گوستگ، سیستان و بلوچستانَے امنیتَے برجاه بیگ، واجه شیخ الحدیث و آئی همفکریں عالمانی گرو انت که اے واجهاں وتی آرامش په مردمانی راحت بیگا ندر کُتگ.

نمیرانیں شیخ الحدیثَے اخلاق

واجهَے زندگی باز ساده ئیں زندگی یے ات، واجه لوگ ساده ئیں لوگ ات انت، واجهَے پُچ و پوشاک هم ساده ئین ات انت.
هر کسے که واجهَے علمی نام و مقام اشکتگت گوں اولی دچار کپگا، شیخ الحدیث، آئیا پجاه آرته نَکُت.
وتی کاراں واجها وت کُت انت.
گوں مهماناں، مهمانداری کُت.
کِشت و کِشاری کُت.
په مدرسه دینی واستا چَنده کنگَے وهدا وتی جندی هر مُلکا شُت.
اے چیز که یکے آئی واستا چه وتی جاها چِست ببوتیں واجها دوست نبوت.
چه ناجایزیں کارانی کنگا په ترندی دیم کپت.
گوں دلگوش کنگ په اشی که واجه مدرسهَے سر مسترات بلے پدا هم گِستائیں دفترے واهُند نه ات.
داں کسے گوں آئیا گپ مَکُتیں ساکت نِشت.
عالِمانی احترامی ایر کُت گر چه آئی شاگرد ببوتین انت، هنچیں بَر بوتگ که آیانی کَوش و پازواری راست کُتگنت.
په تهجدَے نمازا و تحیة الوضو و قرآنَے تلاوت کنگا پابند ات.
باز تا بگوشئے عاجز و خاکساریں مردمے ات.
ماں لوگا گیشتر مطالعه و قرآنَے وانگا گُلائیش بوتگ.

شیخ الحدیثَے درسَے دَیَگَے وڑ و پَیم

مولانا وتی درس جاها، داں گُڈسرا کمرازنی /چهارزانو، حالتا نِشت، گوں دلگوش په اشی که واجه پیرات و آئی ءدرس داں دو ساعتا رندگیرے بوت، بلے یکرندے گِندگ نبوتگ که گوں سرجاها تکّه بدات و درس بدنت، و برے برے درسَے بُنداتا داں آخرا تحیاتَے شکلا نشت.
ماں بارگیں مطلبانی فهمینگا و ماں درسَے دَیَگا بے مٹّ اَت، گوں سادگی و لَهم لَهما درسی گیشوار کُت، تاریخی گپ و جنگانی هنچو پرّیچ کُت که انسانا خیال کُت وت همودا هوار بوتگ، هنچو درسی شیرکن و وش ات که اگه یکے چند ساعت اودا بِنِشتیں هچبر دَمبَرَگی نَزانت.
*درسَے سرا بلوچی بَتَل و بلوچی هما گال که چیر ترّتگنت واجهَے کلاسا پدّر کنگ بوتنت*

شیخ الحدیثَے علمی جاه و عالمانی دیدانک واجهَے بابتا

مولانا حسین پور رحمه الله ءِ علمی جاه و مقام چه اے لقباں *شیخ الحدیث* و *اُستاذ العلما ء* که بلوچستان زَبَر دست تریں عالِماں داتگنت پجّاه آرَگ بیت.
باز بَرا سُهبَے نمازا رند قرآن مجید واجها تفسیر کُتگ.
و نیم قرنے اندازها شیخ الحدیثا گوں صحیح بخاری و آدگه تفسیری کتابان و حدیث، فقه و … گُلائیش بوتگ و بلوچستان و خراسانَے گیشتریں عالم شیخ الحدیثَے شاگرد زانَگَ بَنت.
شیخ الحدیثَے فقهی و علمی دید عالِمانی میانا خاصیں جایگاهے دارَنت و واجهَے فتوا خاص و عامَے گورا قبول انت.
ماں ۱۴۳۰ هق سالا ماں نیو ٹاون کراچیّا په واجهَے عِلمی جاه و مقامَے واستا مزنیں دیوانے برجَم دارگ بوتگ و شیخ الحدیثا ماں آ دیوانا درسے چه صحیح بخاریّا داتگ.

واجه شیخ الحدیث رحمه الله برابر گوں شیخ الاسلام مفتی محمد تقی عثمانی حفظه الله ءِ گپّا: چه مُلکَے دوستاکیں عالماں زانگ و پجّاه آرگ بوتگ.

حضرت صاحبا گوں شیخ الحدیثا خاصیں دوستی یے بوتگ مدام واجهی په مولانا محمد یوسف جان، نام گپتگ و مردمانی سفارش کُتَگ که چه شیخ الحدیثا سوبمند ببنت و آئی کِرّا دیمی داتگنت.
واجه مولانا عبدالعزیز ملازدها هم گوں واجها خاصیں دوستی بوتگ همے بابتا آئیا وتی سرمچاریں بچ شهید مولانا عبدالملک په درسَے وانگا واجه شیخ الحدیثَے گورا دیم داتگ و مولانا ملازاده رحمه الله مدام گوشتگ: مولانا محمد یوسف منا باز دوست انت.
مولانا دین محمد دُرّکانی که تعلیم القرآن شورشادی پاگواجه انت و اسلامی محقق و نبیسوکے زانگ بیت، شیخ الحدیثَے بابتا گوشیت: اے واجه چه اے زمانگَے مردماں نه ات بلکیں چه اسلاف ات، باز مزنیں عالمے ات، که گوستگیں نیکیں مردمانی درائیں صفت و ساڑا ماں آئیا گندگ بوت انت، هما صفاتے که ما ایوک ماں کتابانی تاکانی شَماں دیتّگنت، گوں دلگوش په اِشی که علمی جاهی سک بُرزاِنت، هر وهدے که گِندُک کنگی منی نصیبا بوتگ، احترامَے واستا منی دستی چُکِّتگنت، هر چند که من کوشِست کُتگ مه هِلّانی، پدا هم بوسه داتگنتی،منی باز دوست داشتگ و من هم آئیا باز دوست داراں.

مولانا دُرّکانی واجه شیخ الحدیثَے تواضع و آئی لوگمانَے سادگیں زندگے بابتا گوشیت:
لهتے مردم سادگیں زندگے کنت بلے آئی لوگمان چُش نَهِنت.
یکبرے چه زاهدانَے مزنیں مردماں یکے، واجه شیخ الحدیثا و آئی لوگ مردماں په گُشت سر کَنت و وتی لوگ مردماں هم بارت. آئی لوگبانُک گوں آئیا گوشیت: وهدے که واجهَے لوگا سربوتیں، دیتّوں که چند جنیں آدم ماں لوگا هزمت کنگااَنت چه آیانی سادگیں زندگیّا من خیال کُت که کُلفَت و مولداَنت، بلے رندتِرا سرپَد بوتاں که اے واجهَے جِندَے چُکّ انت.
یکبرے مردے گراں قیمتیں ماشینے شیخ الحدیثا دات که آئیا وتی سات و سفرانی تها سوار ببیت، بلے واجه سفارش کنت آئیا بها بکن ات و آئی زَرّان مدرسه ءِ کار و بارانی هزینه بکن اِت.

شیخ الحدیثَے نبشتگیں کتاباں

(اے کتاب واجها رجانک کتگنت)

۱_تفسیر معارف القرآن
۲_حجة الله البالغة
۳_سیرت خلفاء راشدین
۴_علوم القرآن
۵_مواد مقدر از دیدگاه اسلام
۶_داستان رفاقت من با مودودی
۷_انوار الباری شرح اردو صحیح بخاری.

محمد حملی(هَمُنتِی)