سنت آنلاین

صحابی
بیست و سَیمی باور:
صحابی ھما کسے گوشَگَ بیت کہ گوں پَیغمبَرمحمد صلی اللہ علیہ و سلّما دُچار کَپتَگ و پہ آئیا ایمانی یاورتَگ و گوں ایمان چہ دنیایا شُتَگ.
مُھاجرین
ھما کَس چہ صحابیاں گوشَگ بنت کہ وتی ماتیں ھَنکیں بزاں مکّہ شریفا اللہ پاک و اللہ پاکَے رسول (صلی اللہ تلیہ و سلمَے)  واستا ھِشتَگ و پہ مدینہ شُتَگَنت کہ آ ھم ۱۱۴ کَسَ انت.
انصار
ھمایاں گوشَنت کہ بیھی جاہ اش مدینہ بوتَگ و رسول اللہ (صلی اللہ علیہ و سلم) و مھاجرین آیاں وتی ڈیھا جَہ داتَگ و ھر پِڑا کُمکِّ اش کُتَگَنت.
اصحاب رضی اللہ عنھمَے مقام
بیست و چارمی باور:
گوں رسول اللہ (صلی اللہ علیہ و سَلَّما )نِند و نیاد بوَگَے بُستار بازِانت ھمے بابتا صحابہ رضوان اللہ علیھمَے مقام چہ درائیں اُمّتا بُرزترِانت و گُڈّیگیں مردماں ھر چِنکہ مَزَنیں اللہ والا ببنت پدا ھم پہ صحابی یے کہ یک دمانے گوں رسول اللہ (صلی اللہ علیہ و سلَّما) نِشتَگ نَرَسَنت.
رسول اللہ صلی اللہ علیہ و سلمَے چاریں جَھگیراں
بیست و پنچُمی باور:
چاریں جَھگیرانی فضیلت اے بابتا نَھِنت کہ آ رسول اللہ (صلی اللہ علیہ و سلمَے ) جَھگیر بوتَگَنت اگہ آیانی بَدَلا لَھتے دگہ خلیفہ بہ بوتینت پدا ھم آیانی مقام چہ درستاں بُرزترَات.
بیست و شَشُمی باور:
آیا رسول اللہ صلی اللہ علیہ و سلّمَےخلیفہ معصوم بوتَگَنت؟
رسول اللہ صلی اللہ علیہ و سلّمَے جانشین معصوم{بے گناہ}نَبوتگنت و آیانی فرمانبرداری کَنَگ ماں درائیں کاراں رسول اللہ صلی اللہ علیہ و سلّمَے پَیما لازم نَھِنت، اگہ رسول اللہ صلی اللہ علیہ و سَلّمَے جاہ مِنند پہ کَست یا کہ پہ بے خیالی حکمے بِدَنت کہ آ حکم گوں شرعَے رھبندا برابر مَبیت فرمانبرداری چہ آئیا رَوا نَھِنت، عصمت{چہ گُناھاں پاک بِیَگ} مخصوص پَیغَمبَرانِ انت و رند چہ رسول اللہ (صلی اللہ علیہ و سلما)دگریا بے گُناہ زانَگ شَرّیں کارے نھِنت.
بیست و ھَفتمی باور:
رسول اللہ صلی اللہ علیہ و سلّمَے جَھْمِنِنداں نوکیں کارے ماں دینا آرت نکَنَنت و آیاں چیزے حلال یا چیزے حرام کُتہ نکَنَنت بلکیں آیانی کار اِش انت کہ مردمانَ پہ قرآن و حدیثَے نیمَگا رھشونے کَننت.
بیست و ھشتمی باور:
رسول اللہ صلی اللہ علیہ و سلمَے لوگبانُکانی مقام:
پیغمبر صلی اللہ علیہ و سلَّمَے لوگبانُکاں یازدہ دانَگَ بوتَگَنت: بی بی خدیجہ؛ بی بی زینب بنت خزیمہ<رضی اللہ عنھُما> کہ ھر دوئیں بانُکاں ماں رسول اللہ صلی اللہ علیہ و سلمَے زِندا وفات بوتَگَنت، بی بی عایشہ؛ بی بی حفصہ؛ بی بی اُم حبیبہ ؛بی بی زینب بنت جحش؛ بی بی ام سلمہ ؛بی بی صفیہ ؛بی بی سودہ؛ بی بی میمونہ؛ بی بی جویریہ{رضی اللہ عنھن}اے درائیں بانُکانا اللہ پاک و اللہ جل جلالہ  رسول صلی اللہ علیہ و سلما گِچیں کُتَگَنت و اِشاں پَھکیں مومنانی ماتَ انت، چہ تَوامیں مومنیں جنیں آدماں اِشانی مقام بُرزتِرِانت و چہ اِشانی میانا بی بی خدیجہ و بی بی عایشہ <رضی اللہ عنھما>ءِ مقام و رتبہ مَزَن تِرِانت.

آسمانی کتاباں
بیست و نُھُمی باور:
مُراد اِشِ انت کہ بِمَنّیت اے کتاباں حقَّ انت و چہ اللہ پاکَے نیمَگا پہ مخلوقَے رھشونیاپَیغَمبرانی سرا ایر آرَگ بوتَگَنت.
سِیُّمی باور:
آسمانی نامانی ئیں کتاب اِش انت:
۱-تورات؛ کہ پہ مھتر موسی کلیم اللہ علیہ السلاما ایر آتکَگ؛
۲-زبور؛ کہ پہ مھتر داوود علیہ السلاما ایر آرَگ بوتَگ ؛
۳-انجیل؛ کہ پہ مھتر عیسی علیہ السلاما دیم دَیَگ بوتَگ؛
۴-قرآن کہ پہ مئے واجھا محمد صلی اللہ علیہ و سلّما دیم دَیَگ بوتَگ.

سی و یکُّمی باور:
اَبَید چہ قرآن کریما آ دگہ درستیں کتاب ٹَگَلینَگ بوتَگَنت<بزاں وتی اولی رَنگَے تھا نمَنتَگَنت> و قرآنَے سَمبالَگَے ذمّہ اللہ پاکا زُرتگ، اودا کہ گوشیت: {انّا نحن نزّلنا الذّکر و انّا لہ لحافِظون}۹حجر “بیشک ما قرآنا ایر آرتَگ و ما قُرانَے پانگپانِیں”
اے بابتا داں قیامتَے روچا کسے قرانَے  تھا کمّی و گیشی یاوُرت نکنت.
قرآن رسول اللہ صلی اللہ علیہ و سلّم ءِ مَستریں معجزہ و پہ آئی  پیغمبری بِیَگا ٹُوھتریں منّانکِ انت.
سی و دومی باور:
اَبید قرآنا آ دگہ کتابانی سرا عمل کَنَگ جائز نَھِنت، چیا کہ آیانی وھد و پاس آسر بوتَگ.

سرچمَّگ: بلوچی فقہ