الله پاکَے موجود بیگَے سما

دسته: احکام , بلوچی
بدون دیدگاه
پنج‌شنبه - 18 فوریه 2021

یک ماتے لاپا دو چُک ھست ات! یکیں چُکّا چہ دومیا جُست کُت: تو اے ماتَے لاپَے زندگیا رند، دگہ آیوکیں زندگی یے سرا اوست بستگ؟
دومیا گُوشت: بلکل! چہ اے زندگیارند، یک نه یک زندگی یے ھست! بوت کنت ما ادا پہ ھما واستا یهتگیں کہ پہ دومی زندگیا وتا را ساجو بہ کن ایں۔

اولی چُکّا گوشت: منا باور نہ بیت! نہ زاناں گڑا آ چونیں زندگی یے بیت؟!
دومیا گوشت: من نہ زاناں چونیں زندگی یے! بس من ھمینچو زاناں یک زندگی یے ھست! بوت کنت اودا چہ اِدا شرتر رژنائی ببیت، بلکیں اودا ما وتی پادانی سرا گَشت کنیں! بلکیں ورگ چہ دپا وارت کنیں! اودا ھنچیں ھنچیں چیز بیت آ مئے ھیالانی تہا نہ انت۔

اولی چُکّا کندگے جت و گُوشت: اے چونیں احمقیں ھبر انت! کہ تو کنگ ئے؟ پادانی سرا گردگ و دپَے سرا ورگ! ھچبر بوت نہ کنت!! مارا ھر چیزَے المّی بیت آ چہ ناپگَے روتگا مارا رسیت، اگاں اے ناپگَے روتگ مہ بیت زندگی بوت نہ کنت!

دومیا گوشت: من دگہ ھچ نہ زاناں بس ھمینچو زاناں اودا ھرچیز کہ ھست چہ اے زندگیا شرتر انت. بوت کنت ما اودا گواتَے تہا دم کشّگَے سرا زندگ بوت ایں-

اولی چکا گوشت: بے معنائیں خبر انت کہ تو کنگ ئے! گواتَے خبرا ھچ مہ کن، گواتَے تہا چوں بوت کنت ما وَ آپانی تها ایں۔
۔ بے آپا ھچ ما زندگ بوگَے ھیالا مہ کن ایں!
اگاں دگہ زندگی یے بوتیں گڑا یکے واپس یھتگ اَت مارا گُوشتگتی: کہ دیمَے زندگی چی یے؟بس تو ھمے بزان کہ زندگی ھمیش انت و بس دگہ ھچ نیست-
دومیا گوشت، من دگہ ھچ نہ زاناں بس ھمے سما بیت کہ اگاں وھدے اے زندگی ھلاس بوت گڑا اودا ما گوں وتی ماتا دُچار کپیں ھما مئے ھست و نیست بیت مارا رودین اِیت مارا چہ سکی و سوریاں رکین اِیت.

اولی ھیران بوت و گوشتی: تو زاناں ماتَے ھستی یَے منوّکَے؟ اگاں مات ھست انت گڑا کُجا اِنت؟

دومیا گوشت: منا سما بیت، مات مئے چاریں نیمگا انت، مات ھست انت کہ ما ھست انت بے ماتا اے زند و آ زند ھچ بوت نہ کنت.
اولی منوّک نہ بوت و گوشتی: اگاں مات بوتیں گڑا ما دیستگت! گوں ما گپّی جتگت! وتا را چہ ما چیری نہ داتگت، اگاں مات بوتیں مارا چو تھنائیا یلہ نہ داتگ اَت. من ھمے سرپد باں مات نیست اے ھنچائیں گپ اَنت کہ تو کنگَے.

دومیا پسو دات: برے برے ما بے توار بیں ماتَے ھستی یَے سما بیت کہ واکی ماتے است مارا اے دیم و آدیما سُرین اِیت مارا آرام دنت مارا سک دوست دار اِیت۔

منی مڑا دار و واجھیں سنگتاں گپ بس ھستی یَے سما بوگیگ انت۔
بس ھمے حال مئیگ و مئے ھزار ماتا چہ گیشتر دوست داروکیں مھروانیں واجہ خدا ئیگ انت کہ مارا جوڑی کُرتگ مارا واجہ خدا یَے ھستی یَے سما و یقین بہ بیت۔

ردانک نبیس: ھدایت بلوچ


نوشته شده توسط:سنت آنلاین - 1324 مطلب
پرینت اشتراک گذاری در فیسبوک اشتراک گذاری در توییتر اشتراک گذاری در گوگل پلاس
بازدید: ۴۸
برچسب ها:
دیدگاه ها