بلوچستانَے مستریں مسیت

دسته: بلوچی , هؤر و تؤر
بدون دیدگاه
سه‌شنبه - 7 سپتامبر 2021


مکّی مسیت دزآپ

 کراچیا پد بلوچانی دومی مستریں شھر “دُز آپ” (زاھدان) انت.
دزآپ باز کوھنیں شھرے نہ انت ـ ایشی گوستانک چہ صد سالا ھم کم انت ـ
انگریزَے حاکمیتَے وھدا اے یک کسانیں دیہہ یے اَت ـ انگریزا چہ کوئٹہ ئا ادا ریل آؤرت و دلمانگ بوت اے ریلَے لینا داں ترکیه ئا بہ بارت ـ اے زمانگا یک نیمگا بلوچ و انگریزَے نیاما بانک گُل بی بی رھشونیا مزنیں جنگے بوت و دومی نیمگا دزآپَے بھت ھم چست بوت ـ آ زمانگا ایرانَے سرا قاجار بادشاھانی حکومت اَت ـ رندا پھلوی کهولا حکومت چہ قاجاراں پچ گپت ـ پھلوی بادشاھانی زمانگا دزآپَے نام “زاھدان” ایر کنگ بوت و اے کسانیں شھر روکپتی بلوچستانَے مرکز نامینگ بوت ـ چہ ایشیا پد دزآپا سک باز دیمروی کت و مروچی اے ایران دہ مستریں شھراں یکے ـ

دزآپ ؛ رخشانَے بھر انت ـ ادا گیشتریں مردم بلوچی رخشانی گالوارا گپ کن انت ـ یک کسانیں بھرے زبان براھوئی انت ـ براھوئی زبانَے بُنجاہ بلے چوناھیا میر جاوہ گوشگ بیت کہ تفتانَے ھمسائیگ انتـ

 مولوی عبدالعزیز ملا زادہ بلوچستانَے مزن نامیں دینی عالمے زانگ بیت ـ واجہ بُندرا “سربازی” جاہ منند انت بلے مزنیں مدتے دزآپَے مستریں پیش امامے بیت ـ
وھدے دزآپَے آبادی باز بیت و شھر روچ پہ روچ پراہ و شاھگانی نیمگا تچان بیت گڑا واجہ مار ایت کہ شھرَے مستریں مسیت (دزآپا جمعہ ئے نماز تھنا یک مسیتے بیت) نوں کسان تر اتگ، نمازی سڑک و دمکانی تہا نماز کنگا لاچار انت ـ

۱۹۷۴ ئا واجہ عبدالعزیز ملا زادہ کوھنیں شھرا چہ کمّو در یک نوکیں مسیتے یے اڈ کنگَے جار جنت ـ آ زمانگا مسیتَے زمین کساس شش صد (۶۰۰) مربع میٹر بیت ـ مسیتَے نام مسلمانانی مقدس تریں شھر “مکہ” ئے نامَے سرا “مکّی مسیت” ایر کنگ بیت ـ مسیتَے ھمراہ یک کسانیں دینی مدرسہے ھم اڈ کنگَے جار جنگ بیت ـ
پہ مسیتَے جوڑ کنگاددزآپ، واش، میر جاوہ، زابلا گر داں سرباز، سراوان و پھرہا بلوچ رد بنت و کاینت ـ
اے مردم پہ مسیتا مفت مزدوری کن انت ـ ۱۹۸۶ئا مسیت داں حدے تیار بیت و ھمے سالا پہ نمازا ساڑی بیت ـ بژن بلے واجہ عبدالعزیز سالے پد چہ دنیائا لڈ ایت و رؤت ـ

مولوی عبدالعزیزا پد واجہَے مستریں و شرتریں شاگرد مولوی عبدالحمید اسمعیل زھی دزآپَے مستریں پیش امام نامینگ بیت ـ واجہ اسمعیل زھی بُندرا رخشانَے مردم انت و مروچی بلوچستانَے مستریں دینی رھدربر انت ـ

۱۹۹۰ ئا مولوی عبدالحمید اسمعیل زھی مار ایت کہ اے مسیت و مدرسہ ھم شھرَے زلورتاں پورا کت کنگا نہ انت ـ شور و سلاها پد مسیتا پراہ کنگَے جار جنگ بیت ـ کر گورَے زمین پہ مسیتا زیرگ بنت ـ مسیتَے زمین چہ ۶۰۰ مربع میٹر ا۳۲ ھزار مربع میٹرا سر بیت ـ مسیتَے گمبد کہ پیسرا پنچ بنت نوں ۵۳ کنگ بنت ـ مدرسہ ھم سک باز پراہ کنگ بیت ـ

اے مسیت کوھنیں بلوچی و ایرانی رھبندا جوڑ کنگ بوتگ ـ الّم گوشت نہ کناں بلے لکھانی تہا مردم ادا نماز کت کن انت ـ مدرسہ ھم مسیتَے بھر انت ـ اے مدرسہ ئا رو دراتکی بلوچستان (پاکستان) ، اوگانستان، کردستانا بہ گر دنیائے کنڈ کنڈا چے ھزارانی کچّا نودربر وانگا کاینت ـ

“مکّی مسیت دزآپ” چہ امام رضائے مزار (مشھد) و جمکران مسیت (قُما) رند ایرانَے سیمی مستریں عبادت جاہ زانگ بیت ـ لھتیں گوش انت تھرانَے امام خمینی مسیت سیمی انت و مکّی چارمی ـ منی جندَے پٹ و لوٹَے ردا امام خمینی مسیت چہ مکیا سک باز کسان انت ـ مکّی مسیت دنیائے پانزدہ مستریں مسیتاں چے یکے ـ اے تنیگا کُل بلوچستان (روکپتی و رودراتکی ھر دو) ئے مستریں مسیت انت ـ

مکّی مسیتَے اسپیتیں گُمبد سک ڈولدار انت ـ ایشی مینار چہ دورا گندگ کاینت و شھرَے براہ انت ـ مسیت چوش وَ برابر انت و ادا نماز ھم بوئگا انت بلے مسیتا ڈولدار تر کنگَے کار انگت برجم انت ـ

 چوناھیا مسیت نمازَے جاہ انت بلے اسلامَے پیغمبرَے زمانگَے نبوی مسیت (مدینہ) ئے رنگا اے روکپتی بلوچستانَے سیاسی و دینی مرکز انت ـ پہ ھرچ سیاسی و دینی جیڑہَے گیش و گیوارا مردم وتی چمّاں مکی مسیتا سک دینت کہ باریں مکی مسیت اے جیڑہَے سرا چے رھشونی دنت ـ ایرانَے صدارتی گچین کاری بہ بنت یا پارلیمنٹَے، شھر ءِ بلدیاتی گچین کاری بہ بنت یا میان استمانی جیڑہ مردم پہ رھشونیا مکی مسیتَے نیمگا چار انت ـ پمشکا مسیتَے پیش امام مولوی عبدالحمید اسمعیل زھی ماں ایرانا نہ تھنا بلوچانی بلکیں کل اہل سنت مسلمانانی رھشون لیکگ بیت و آئی گپ و لیکہ سک باز ارزش دیگ بنت ـ

 ایرانَے حکومتا سالے پیسر وھدے بلوچستانَے بھر و بانگَے لیکہ دیما آؤرت گڑا مکی مسیتا آئی ترند بگیری کُت ـ ناچار حکومت پشتا شُت ـ ھمے رنگا تربتا حیات بلوچَے کوش و بانک کریمہ بلوچَے کوش ھم مکّی مسیتا ترند ایر جَت انت و اے گوں بلوچ راجا نارواھی لیک ایت ـ چیزے ماہ پیسر مکّی مسیت ءَ وتی مدرسہ ئا بلوچی وانینگ ءِ جار ھم جتگ اَت نوں الّم نزاناں اے کار بوئگا انت یا نا ـ
(جی! بلوچستانَے سرجمیں دینی شورایی مدرسه یانی توکا بلوچی وانینگ بیت، بزاں سال چارم، بزاں جماعت چار والا بلوچی درس دیگ بنت، کتابے که درس دیگ بیت آ کتابا واجه مولانا عبدالکریم حسین پور/راجی، نمیرانیں واجه شیخ الحدیث مولانا محمد یوسف حسین پور رحمه الله ئے نیکیں پشپد و جهمنند و عین العلوم گُشت سراوانَے دینی وانگجاهَے پاگواجها نبشته کتگ.)

 مکّی مسیت بلوچ گُلزمینَے یک پجّارے ـ ھنچوش کہ نوٹرے ڈیم (Notre-Dame) ئے چرچ فرانسَے یا تاج محل ہندوستانَے ـ
Zulfiqar Ali Zulfi
ردانکار: ذوالفقار علی زلفی
رِد و بند کنوک: هَمُنْتِی


نوشته شده توسط:سنت آنلاین - 1221 مطلب
پرینت اشتراک گذاری در فیسبوک اشتراک گذاری در توییتر اشتراک گذاری در گوگل پلاس
بازدید: ۲
برچسب ها:
دیدگاه ها