سنت آنلاین

ماں جانَے شودگا سَے چیز لازم انت:

۱-دپَے شودَگ. ۲-پونزَے شودَگ. ۳- درائیں بدنا شودَگ.
دلگوش: کسے کہ سور (سُنَّت)نبیتَگ پہ آئیا لازم انت کہ وتی خاصیں عضوَے پوستا بشودیت.
غسلَے سُنّتاں
۱-دوئیں دستانی شودَگ. ۲-خاصیں عضوانی(فرجَے) شودگ. ۳- اگہ جانَے سرا نجاستے ھست آئی شودَگ. ۴-پدا چار اندامَے(وضو ) گِرَگ. ۵-سَے رندا درائیں جانَے شودَگ. ۶-اگہ آپ پہ جنیں آدمَے مُودانی بُنارسیت گُڈا مُودانی پَچ کَنَگ لازمی نَھِنت.
غسلَے بھراں
فرض: غسلَے کَنَگ پنچ وھدا فرض انت:
۱-وهدے کہ شھوت پہ فشار ولذت در ببیت. ۲-وپت و وابَے وھدا. ۳-جنیں آدمَے پاک بیگ چہ ماھوارہ ئیں نادراھیا (حیضا). ۴- چہ چلّہ بِیَگا رند جنیں آدمَے پاک بِیَگ . ۵- چہ وابا رَند، ترّے گِندَگ.
واجب:
۱-مُردَگَے شُودَگ. ۲- کافرے کہ ناپاکے (جنبے) وھدا مسلمان بیت.
سنَّت:
۱-آدینَگَے روچا جانَے شودگ. ۲- دوئیں عیدانی روچا جانَے شودگ. ۳-عرفہَے روچا بزاں ذوالحجہَے نُھُمی روچاجانَے شودگ. ۴- احرامَے وھدا غسل کَنَگ.
مستحب:
۱-کافرے کہ ماں پاکے حالتا مسلمان بیت. ۲- گْونڈیں چُکے کہ بالغ ببیت.
تیمم
تیممَے فرض سَے دانگَنت:
۱-نیت، ارادہ بکنت کہ گوں خاکا پہ نماز ءِ وانَگا وتا پاک کَناں.
۲-دوئیں دستانی جَنَگ ماں خاکا و دیمَے لَگاشَگ.
۳-دوئیں دستاں ماں خاکا جَنَگ و ھر دوئیں دستاں گوں سُروشاں لَگاشَگ.
مسئلہ: ھر کسے کہ چہ آپا مِیلے اندازگا دور ببیت یا چہ آپا نزّیک انت بلے نادراہ انت ترسیت کہ چہ آپَے کار مرز کَنَگا بدتر بیت یا کہ چہ دشمن و چیزے ترسیت پہ چُشیں مردماں تیمم جایزانت.
مسئلہ: ھر چیزے کہ چہ زمینا اِنت تیمم کَنَگ چہ آئیا روا اِنت پہ دَرور: گَچ، آهک، ریک، ڈَل و ڈوک وو.
مسئلہ: هر چیزے کہ گوں آسا سوچَگ بیت و پُر بیت چہ آئیا تیمم جایز نَھِنت، چُش کہ لَٹّ و دارا، ھمے پیم چیزانے کہ گوں آسا نرم بَنت چہ آیاں تیمم روا نَھِنت چُش کہ طلاہ و آسنا.
مسئلہ: غسل و وضو ءِ تیمم ھمے یکّیں وڑا اَنت.
تیممَے پروشوکاں
ھر چیزے کہ وضو ءِ پروشوکَت تیمم َے ھم پروشوکِنت، ھمے پیما آپَے گِندَگ وھدے کہ بِتوانت آ‏ئیا کار مرز بِکَنت، تیمما پروشیت.
گوں یک تیممے چند نمازَے وانَگ جایزانت.

سرچمگ: بلوچی فقہ