معاد سی و سَیمی باور:

دسته: احکام , بلوچی
بدون دیدگاه
چهارشنبه - 9 ژوئن 2021

معاد
سی و سَیمی باور:
رند چہ مَرگا و پیسر چہ قیامتا ما را ھَنْکینے ھَست کہ آئی  نام قبرانت، قبرَے تھا مومن اکرام کَنگ و کافر عذاب دَیَگَ بَنت و اے چیز حق اَنت.
ماں تفسیر رازیا اے آیَتَے {النّار یُعْرَضُونَ عَلَیْھَا غُدُوّاً وَّ عَشِیّاً و یَوْمَ تَقُومُ الْسّاعَۃُ اَدْخِلُواْ ءَال فِرْعَوْنَ اَشَدّ الْعَذَابَ} سورۃ المومن۴۶ تفسیرا چو آتکَگ: کہ مئےواجَھاں چہ اے آیَتا پہ قبرَے عذابَے حق بِیَگا دلیل گِپتَگ، گوشتَگ اِش اے آیَتَے مُراد ایش انت کہ عذاب سُھب و بیگاھا پہ آیاں پیش کَنَگَ بیت و آیتَے مول قیامت نھِنت بلکیں قبراِنت.
مُنْکَر و نَکیر کہ دو فرشتگ اَنت آیَگ اِش ماں قبرا بر حق و راست اِنت کہ چہ مُردَگا جُستانے گِرَنت.
سی چارمی باور:
مَرگا پد انسانانی <مُچّی> حَشر بِیَگ و صُورَے تھا دو رَند دَمَگ یکّے پہ مِرَگا و دومی پہ زِندَگ کَنَگا وآسمانَے ٹُکّر ٹُکُّر بِیَگ و اِستارانی رِچَگ و کوھانی شِن شِن بِیَگ و مُردگانی پاد آیَگ چہ قبرا و درائیں جھانَے اَڈّ بِیَگ رند چہ صُورَے دومی دَمَگا حق و ثابت اِنت.
حوض
سی و پَنچُمی باور:
رسول اللہ صلی اللہ علیہ و سلَّمَے و درستیں انبیا علیھم السلامَے حوض ماں قیامتا برحق اَنت، رسول اللہ صلّی اللہ علیہ و سَلَّما وتی حوضَے سَتا اے پَیما کُتَگ: منی حوضَے آپ چہ شیرا اِسپیت تِراِنت و چہ بینَگا شِیرکِن تِراِنت و گَلاسی ھنچو کہ اِستاراں بازاَنت، ھر کس چہ آئیا بْوارت ھجبَر پَدا تُنّیگَ نَبیت.
شفاعت
سِی و شَشُمی باور:
قیامتا رسول اللہ صلی اللہ علیہ و سَلَّمَے سُفارش کَنَگ اللہ پاکَے گْورا پہ درائیں اُمّتانی حساب و کِتابَے بُندات بِیَگا و پہ وتی اُمّتَے گُنھگاریں جھندمیانی در کَنَگا چہ جھندما حق و راست اِنت.
سی و ھفتمی باور:
ما را پہ پُھل صراطَے حق بیَگا ایمان ھست، پُھل صراط پُھلے کہ جھندمَے سرا بَنْدَگ بوتَگ و درستیں مردمانا چہ اے پُھلا گْوزگی انت.
“پُھل بَنداَنت دوزخا پُھلے کہ سَک دُشوارَگ اِن
ھمچو زھما تیزن و مانند مُودا بارَگ اِن”
سی و ھشتُمی باور:
برابر گوں قرآنَے دستورا گُلباگ<جَنّت> و جھندم ھر دو‌‌‏ئیں اڈ کَنَگ بُوتگنت، اللہ پاک گلباگَے بابتا گوشیت: “اُعِدَّت لِلمُتّقین”سورہ آل عمران۱۳۳٫و جھندمَے بابتا گوشیت: “اُعِدّت لِلْکَافِریْن” سورۃ البقرۃ۲۴؛بزاں جَنّت و دوزخ پیسرا اَڈ کَنَگ و تَیار بوتَگَنت، ھمے وڑا مِھتر آدم و بی بی حواعلیھما السلامَے داستان کہ ماں بھشتا زندگی اش کُتگ و رندا چہ اودا دَر کَنَگ بوتَگَنت گوں قرآنَے آیتاں ثابت انت.
پاکیں ربّا لکّانی لک شُکر انت کہ ایمانَے کتابَے دَراں پہ سلامتی آسر بُوتَنت، دیما کتاب الطھارت پیداگ اِنت.

سرچمگ: بلوچی فقه


نوشته شده توسط:سنت آنلاین - 1101 مطلب
پرینت اشتراک گذاری در فیسبوک اشتراک گذاری در توییتر اشتراک گذاری در گوگل پلاس
بازدید: ۴
برچسب ها: