سنت آنلاین

مات و پِت ءِ حق چہ پھکیں حقاں دیما تِراِنت کہ باید اِنت چُکاں آیانا شرے سرا ادا بِکَنَنت ھمق بابتا پاکیں نبی صلی الله علیه و سلم گوشیت: لعنت ھما چُکّ ءِ سرا ببات کہ آئی ءِ پِت یا مات کماشے سِنّا بِرسیت و آ چُک وتی مات و پِت ءِ ھِزمت کَنگ ءِ وستا وتا بَھِشتا سر مَکَنت. چہ ادا زانَگ بیت کہ مات و پِت ءِ عزت و احترام و آیانی ھِزمت کَنَگ مَزنیں کارے و ھر کَسا اے ھم نصیب نبیت انچوش کہ اللہ قرآن ءِ توکا بازیں جاھے وعدہ و بازیں جاھے وَعید بیان کَنت و گوشیت: انسان توانت مات و پِت ءِ واستا وَتا را جَنّتا سَر بِکَنت و یا کہ وتا را ھلا بِکَنت. اللہ قرآن ءِ تھا گوشیت: { وَ قَضیٰ رَبُّکَ ان لّا تَعبُدو اِلّا اِیّاہُ وَ بِالْوَالِدَینِ اِحساناً اِمَّا یَبْلُغَنَّ عندَکَ الْکِبَر اَحَدُھما اَوْ کِلَاھُما فَلاتَقُل لَّھُمَا اُفّ وَ لَاتَنْھَرْھُمَا وَ قُل لَّھُما قَولاً کَریماً} تئی رب ءِ فرمان اِنت کہ اَبید آئیا کسے را عبادت مَکَن و وتی مات و پت ءِ واستا نیکی بِکَن و وھدے کہ آ پہ پیری ءِ سِنّا بِرَسَنت یکّے چہ آیاں یا کہ ھر دُوئیں، آیانی دیما اُف ھم مَگوش و وتی توارا چہ آیانی توارا بُرزتِر مَکَن و گوں آیاں نیکیں گَپ بِجَن.بی بی عائشہ گوشیت: مَردے رسول اللہ ءِ گورا آتک کہ آئیا کماشے ھمراہ اَت واجَھا گوشت: کماش ءِ پَجّارا بِکَن؟ مَردا گوشت: مَنی پِت اِنت. واجھا گوشت: راہ ءِ رَوَگا چہ آئیا پیسر مَبو و نِندَگ ءِ وھدا پیسرتِر مَنِند و آئیا پہ نام توار مَکَن. رسول اللہ ءِ گورا مَردے آتک و گوشتی: مَنا جھاد ءِ واھَگ ھَست؛مَنا اجازت بِدئے؟ واجَھا گوشت: تئی مات زندگ اِنت؟ گوشتی: ھَو!
رسول اللہ گوشت: برو وتی مات ءِ ھِزمتا بِکَن کہ جنت مات ءِ پادانی چیرااِنت اے گپَا واجھا۲ یا ۳رندا تکرار کُت.گوں مات و پِتا نیکی کَنَک ھنچُشیں کارے کہ عقل و شرع پہ اے کارا ھم انسانا دستور دَنت. اللہءِ فرمان اِنت: {وَاخْفِضْ لَھُما جَناح الذُّلِّ منَ الرَّحمَۃِ}چہ مِھر و محبتا وتی بالان مات و پِت ءِ دیما پَچ بِکَن. ھنچُش کہ مات و پِت ءِ ھِزمت کَنَگا بازیں مُزد ھَست ھَمق پَیم آیانی بے احترامی وبے عزتی کَنَگا ھم مَزَنیں گُناھے ھَست کہ اللهءِ ھِژم و غَضب ءِ سَوَبَ بیت، مِھتر ابوبکر گوشیت: کہ واجہ رسول اللہ گوشت: کہ گوں اللہ کَسا شَریک مَکَن و پِت و مات ءِ نافرمانِیّا مَکَن کہ چہ مَزَنیں گُناھان اِنت. انسان چہ مات و پِت ءِ شاد و گَل بِیَگا بایداِنت شاد و گَل ببیت و چہ آیانی پَدَرد و دِلگِرانیّا وتا ھم گوں آیاں شریک بِزاں و چہ ھرکارے کہ آیاں مَکَنَ کَنَنت نباید آ کارا بِکَنت و بے آیانی اِجازتا پہ سات و سفرا ھم مَرَوت و آیانا گوں دل دوست بداریت و ھر وھدے کہ آئیا توار کَنَنت ھما دمانا بایداِنت تیار ببیت و آیانی مَرگا پَد پہ آیاں دعا بِکَنت. اللہ پہ مھتر موسی وحی کُت: کہ ھر کسے کہ مات و پِت ءِ گَپ گِپت و مَنی خبر نَزُرت من آئیا فرمانبردارانی رَما ھور کَناں و ھر کسے کہ مَنی خبر گِپت و مات و پِت ءِ خبر نَگِپت من آئیا چہ نافرمانان نُبیساں. رسول الله گوشیت: مات ءِ دعا چہ پت ءِ دعایا زودتر قبول بیت، جُست گِرَگ بوت: چیا؟ واجھا گوشت: مات چہ پِتا مھربانتِراِنت و مِھربان ءِ دعا رد نبیت. دگہ جاھے رسول اللہ گوشیت: سَے کَس ءِ دعا اَلَّم قبول بیت: ۱-پت ءِ دعا ۲-مسافر ءِ دعا۳-مظلوم ءِ دعا.
دنیا پہ مقصدے جی و جان ترا گوشیت ماتی محبت ءِ مَٹ و بدل نبیت
سرچمَّگ: ۱-باغ زندگی. ۲-حقوق والدین. نبیسوک: محمد عظیم حسین بر.

خلیل الرحمان ھوت