سنت آنلاین

سُھبَے نماز:
سُهبَے نماز هما وهدی بُندات بیت کہ بام بدات دان روچ دراتکا پیسَر. پیشینَے نماز:
وهدے بندات بیت کہ ساھِگاں چَھر بِکَنَنت و نمازَے گُڈّی وھد ھما اِنت کہ ھر چیزَے ساھِگ دو برابر آئیا بِبیت.
دیگرَے نماز: رند چہ پیشنَے نمازَے وھدا بُنگیج بیت داں روچ مِنِندَے وھدا.
شامَے نمازَے وھد: چہ روچ مِنِندا بُندات بیت داں کہ سُھری چہ آسمانا بیگواہ بِبیت.
وپتِنَے نماز گوں وترَے نمازا:
رند چہ سُھرے گار بِیَگا بُندات بیت داں کہ سُھبَے بام بِدات.
اصلی ساھِگ و زوالَے جاہ آرگ:
گھتریں کار پہ زوالَے زانَگا اِش انت کہ تچکیں لَٹّے گِرَگ ببیت و ماں راستیں زمینے کَل کَنَگ ببیت، ھر وھدے کہ ساھِگ چہ روچ مِنِندَے نیمَگا کَم بِیاں بوت داں جاھے کہ چہ اودا دِگہ کمتر نَبوت بلکیں دیم پہ رودراتکا گیش بِیاں بوت گُڑا ساھِگَے سرا چیدگے ایر بِکَن، چہ چیدَگا داں لَٹّا اصلی ساھِگ اِنت و چہ چیدَگا آ دیم زَوال گوشَگَ بیت.
وھدانے کہ نمازَے وانَگ ماں آ وھداں جایزنَھِنت:
اے وھد سَے دانَگَنت:
۱-وهدے کہ روچ ٹِکَّ کَنت.
۲-وھدے کہ روچ مُھر بیت.
۳-وھدے کہ روچ نِندیت.
ماں اے سَئیں وھداں فرضی نمازے وانَگ ببیت یا کہ جنازہَے نماز ببیت یا کہ سجدہ تلاوتے ببیت یا کہ سجدہ سھوے ببیت یا کہ قضایی نمازے وانَگ ببیت ھِچ یکّے جایز نَھِنت، ابید ھما روچَے دیگرَے نماز کہ قضا بوتَگ؛ گڑا اے وھدا آ وانَگ بیت.
و دو دگہ وھدانت کہ ماں آ وھداں نفلی نمازَے وانَگ مکروہ انت:
۱-وھدے کہ بام دات داں رو دراتکَے درگَتا اَبید سُهبَے سُنتاں دگہ نفلَے وانَگ جایز نهِنت.
۲-دیگرَے نمازا پد، داں کہ روچ نِندیت.
ماں اے دوئیں وھداں نماز فرضَے وانَگ یا جنازہَے نمازَے وانَگ یا کہ سجدہ تلاوتَے کَنَگ و سجدہ سھوَے کَنَگ مکروہ نَھِنت.
دلگوش: پیسر چہ مغربَے نمازَے وانگا نفلَے وانَگ مکروہ انت. ھمے پیما نماز نفلَے وانَگ خطبہ ئے وانَگَے وھدا جایز نَھِنت.
ھمے ڈولا دو فرضی نمازَے وانَگ ماں یک وھدے جایز نَھِنت تُری کہ نماز وانوک ماں سات و سفرا ببیت یا کہ ماں وتی جاہ و دَوارا بِبیت، ابَید پہ حاجیاں ماں عرفہ و مُزدلفہ ئے مَیدانا ، کہ پیشین و دیگرَے نمازا ماں عرفاتا و شام و وَپتِنَے نمازا ماں مُزدلفہ ئے میدانا ھور وانَنت.

سرچمگ: بلوچی فقه