سنت آنلاین

بلوچستانَے سعدي ـ رَحْمَةُ اللهِ عَلَيْه۔

واجَھَے پیدائش

کمّ انت ادب دۏستے کہ گۏں «مولانا عبدالله روانبدا» پجّارۏک مبيت. تۏانېں بگْوشېں کہ بلۏچي ادبَے يکېن رۏچ همے واجه اِنت کہ مان بلۏچستانا در آتکگ و وتي برانزانَے اے ملکَے تها مانشانتگ و هر نېمگا نوري شهمېنتگ.
اے واجهَے زندگي نامگ ادان اختصاري صورتا پېش کنگ بيت.
مولانا دوشنبهَے رۏچ مان شعبانَے ماھا، ۱۳۴۵ هـ.ق. سالا باهَوکلاتَے تها چہ مات بوت.

واجہ پنچ سالگے تۏکا قرآن مجيدَے ناظره وتي پتَے گْورا «حاجي محمد يحيي» دَربُرت. آئيا سک بازېں هوش و ذکاوتے هستت و چہ همشيا آئي پِت پہ آئي تعليما اهتمام کت کہ رۏچانَے درسا دات و شپانَے آئي درسانا گۏش داشت. وهدے کہ دہ سالگ بوت گۏں وتي پتا همراہ وتي ناکۏ «مولوي عبدالقادرَے» گْورا پہ «مَندا» شت. مولوي عبدالقادر مندَے ملاّ و پېشوا يَت.

مولانا روانبد ماں پاکستانا
واجھا لهتېن کتاب «مولوي تاج محمد بليدهاي» و «مولوي محمد عمر» کراچی ئےجاہ منندَے گْورا ونت. ۱۳۷۱هـ.ق. سالا«مدرسہ مظاهر العلوم» کراچي ئے تها داخله اے گِپت و چہ محضر استادانے هنچۏش کہ «مولانا محمد علي سندي» کہ دکتر اقباللاهوري ئے استاد اِنت، «مولانا قاري رعايت الله»، «مولانا غلام مصطفي سندي»، «مولانا شيخ الحديث حافظ فضل أحمد» و «مولانا عبدالحليم» فائدگَے گپت۔
۱۳۷۲ ق. سالا واجہ مان سدان شاگردا اوّلي امتيازا کٹّ کرت و انعامي گپت و درسي تمام کت. رندا پہ «سنتر» چہ گْوادرَے هندا رفت و چُنت ماهے اۏداں ديني پېشوا بوت.
۱۳۷۳ ق. سالا حاجي ملا محمد يحيي مولانا روانبدَے پت پہ حجّا شت و مدينہ منوره ئے تۏکا پہ نادارهے سببا وفاتَے کت و همۏداں کـَلّ بوت و پيشّنَے مردم بے ملاّ بوتنت، نوں مردم رفت و مولوي عبدالله صاحب اِش چہ سنتر پہ پيشّنا ياوُرت.

 واجها مان رم و لچّہ ئے تها کوّاس و ماهراَت چہ آئي پد منتگېں آثار پہ اے اِدّعائا گْواهيا ديَنت. آئي مزن شانېں لچّهکارے اَت. ابيد چہ شاعري، وعلم عروض، بديع و بيان ماں اے دگہ علمان هم تسلّطی داشت. مولانائا پہ هر لچّهکارے علم عروض و بديعَے زانگا لازم زانت.
واجها مان سال ۱۳۸۰ هـ. ق ماں پيشِّنَے دولتي دبستانا معلّم بوت و اے وتي کارَے تها تا «بازنشستگي» مَنت. ۱۳۸۸ ئے سالا واجها «مدرسہ ديني تعليم القرآنا» ماں پيشّنا بندات کرت کہ هنگت هست اِنت و واجهَے چُک «مفتي نظام الدين» آئرا ادارہ کنگا اِنت.
مولانا روانبد ـ رَحْمَةُ اللهِ عَلَيْه ـ همېشہ پہ مردمَے جاورَے گهبودي و منطقہ ئے شرِّياکوشست کرت هم پہ آياني مادّي و هم پہ آواني معنويّا.

مولانائے وانگياں:

مولانا وتي زندَے گُڈّي بهرا گېشتر پہ وانگياني نزّآرگا گْوازېنت. مولانائے منتگېن پد و اثر اېش اِنت:
۱- ترازوي قلم: اے کتاب علم رياضي و حسابَے باره اِنت کہ لچّہ و رم آئي تها هوار انت. دان هنّون دو برا چاپ بوتگ.
۲- تجويد النحو: گْونڈېں رساله اے مان تجويدا کہ پہ نو دربران نبيسّگ و چاپ بوتگ.
۳- النهر الفائض: اے «عروج الفرائض» ئے شرح اِنت. «عروج الفرائض» کتابے کہ آئي متن لچّه اِنت و آئي بُنگپّ ميراث اِنت. اے کتاب هن مولانائے وتيگ اِنت، کہ رندا آئي سرا شرحَے نبشتگ کہ همے النهر الفائض اِنت. النهر الفائض رم اِنت.
۴- قطعات الذهب في قواعد المذهب. لچّه اے رساله اے مذهب حنفي قواعدَے تها. اے کتاب هم چاپ بوتگ.
۵- نثر الفرائد في شرح نظم القواعد و الفوائد: اے کتاب نظم القواعد والفوائد کہ لچّه اے آئي شرح اِنت گۏں نثرا. اے کتاب فقه ئے قواعد و اصولا گۏں آياني فرعاں اِں بغل گِپتگ. اے کتاب هں چاپ و شنگ بوتگ.
۶- قطوف دانية في انواع ثمانية: علم نحوَے باره اِنت کہ لچّہ و رم اَوار اَنت. چاپ نبوتگ.
۷- النهر الصافي في العروض و القوافي: اے رسالہ شعرَے عروض و قافيہ ئے بارہ اِنت. اے هم چاپ نبوتگ.
۸- مجموعه فتاوي: اے هما استفتاياني جواب اِنت کہ چہ مولانا جست کنگ بوتگ اَنت. متأسفانہ اے هم چاپ نبوتگ.
۹- مجموعه ی غزليات و قصايد فارسي و عربي: اے کتاب شامل اِنت واجهَے فارسي و عربي اېں دستونک و قصيدهان. اے کتابا واجہ دکتر عبدالغفور جهانديده ئا چاپ کتگ.
۱۰- مجموعه ي اشعار و غزليات بلۏچي: واجهَے بلۏچي دستونک و لچّهان اَنت کہ گۏں صد اپسوزا گْوشان: دنيگتا تصحیحَے گۏنا چاپ نبيتگ.
۱۱- ترجمهي کتاب «قصد السبيل» چہ مولانا اشرفعلي تهانوي ـ رَحْمَةُ اللهِ عَلَيْه ـ کہ چہ اردو پہ پارسي ترجمہ بوتگ.

 وفات
مولانا عبدالله روانبد ـ رَحْمَةُ اللهِ عَلَيْه ـ ماں ۶۳ سالگي عمرا اے کوڑوېں گيديا يک شنبهَے رۏچ، عيدِ حاجياني بيست و سومي تاريخ ۱۴۰۸ هـ.ق سالا برۏبر گۏں ۱۳۶۷ ش مان قطرا يلہ دات و وتي راجي تهنا هشت و همۏداں قطرَے تها دفن بوت.

وفاتَے سَوَب

اے سالا مولانا پہ حج شتگ اَت. وهدے کہ مولانا حجَّے مناسکا تمام کنت و روت اِنت پہ مدينہ ئا و واجہ رسول ـ صَلَّىٰ اللهُ عَلَیْهِ وَسَلَّم ـ ئے قبر ءُ مسجد و اے دگہ مشاهدھاں زيارت کنت. چہ اۏداں دېم پہ رياض واترّ بنت و چہ اۏداں دېم پہ اماراتا رهادگ بنت. وهدے کہ قطرَے مرزا رس اَنت آياني ماشين چپّ کنت و همدان واجهَے ساه بال کنت. الله چہ آئي راضي بات و چہ آئي کمّيان در گْوز بکنت. آمين يا ربّ العالمين.
(اے مطالب گېشتر چہ «سعدي بلۏچستان» چہ: غلامحسين جهانتيغ گرگ بيتگ انت.)

بلوچی بوانیں ، نبیسوک: واجہ مولانا سید عبدالکریم حسین پور(راجی)