استاد مولانا عبدالکریم راجی (اُستاد واجه مولانا عبدالکریم راجی نمیرانیں واجه شیخ الحدیث مولانا محمد یوسف حسین پورَے(رحمہ اللہ) نیکمردیں پُشپَد و جهمِنند و رونشتی بلوچستانَے کوهنیں دینی وانگجاه بزاں عین العلوم گُشتَے پاگواجه و سَرمَستر اِنت و بلوچی زبانَے مزنیں ادیب و قلمکار و ردانک نبیس و شاعر و لغت زانت انت.) ماں […]

 

استاد مولانا عبدالکریم راجی

(اُستاد واجه مولانا عبدالکریم راجی نمیرانیں واجه شیخ الحدیث مولانا محمد یوسف حسین پورَے(رحمہ اللہ) نیکمردیں پُشپَد و جهمِنند و رونشتی بلوچستانَے کوهنیں دینی وانگجاه بزاں عین العلوم گُشتَے پاگواجه و سَرمَستر اِنت و بلوچی زبانَے مزنیں ادیب و قلمکار و ردانک نبیس و شاعر و لغت زانت انت.)
ماں بم پُشت، سیرکانَے آدینگَے نمازا که ماں ۹۶/۱۱/۲۰ روچا برجم دارگ بوت واجه استاد راجیا اے بابتا گپ و تراں کُت.

واجه راجیا وتی گپانی میانا اے چیزا گوشت کہ آیا دروت و دراھبات، السلام علیکمَے جاھا گپت کُت کَنت یا کہ انا؟ واجھا گوشت: بایداِنت سلام وتی جاھا بمانیت و دروت و دراھبات آئی سرجمیں بزانتا دات نکنت!

اولی منانک: مهتر جابربن سُلیم اولی رندا که رسول الله(صلی الله علیه و سلمَے) دیوانا آتک، دُرّیں رسول(صلی الله علیه و سلمَے) پجّاه نَیاورت بلے انچو سَرپَد بوت که مردم واجهَے گپّاں گوشدارنت و په کارے که امر کنت، کَنَنتی و چه کارے که مَکَن کنت دست دارَنت.

چه یکّے جُستی کُت: مَن هذا؟ اے کے اِنت؟ گوشگ بوت: رسول الله(صلی الله علیه و سلم) انت.

آتک و گوشتی: علیک السلام یا رسول الله، داں دو رندا مردا وتی گپ تکرار کُت،

رسول الله(صلی الله علیه و سلما) آئیا گوشت: اے سلامَے داب نهِنت، اے و مُردگانی سلام انت بلکیں بگوش: السلام علیک یا رسول الله.

دلگوش: ادا هر دوئیں سلاماں دگری یے نیست، بزانت و معنایش یکے انت، بلے ما بایدانت ماں هر لبزا شرعَے رندگیریا بکنیں.

رندا رسول الله (صلی اللہ صلی اللہ علیہ و سلم ) آئیا سلامَے داب یاد دات و گوشتی: سلامَے اشکنوک ماں جوابا بگوشیت: و علیکم السلام.

دلگوش: لهتے مردما که سلام بدیئے ماں پسوا گوشیت: سلام چه ما(سلام از ما)، اے سلامَے پسو نهِنت.

الله گوشیت: واذا حُیِّیتُم بتحیة فحیوا باحسن منها او ردوها.

بزاں هر کسے که شمارا سلام دات شما آئیا گهتریں پسوے بِدَیِت یا هما پیمے که شما را سلامی داتگ هما وڑا آئیا هم بگوشِت.

اے بابتا کسے که گوشت:
السلام علیکم.

شما بگوشِت: و علیکم السلام و رحمة الله.

اگه آئیا گوشت: السلام علیکم و رحمة الله.

شمابگوش اِت: وعلیکم السلام و رحمة الله و برکاته.

هر یکے بدلا ۱۰ ثواب انسان رسیت.

دلگوش: گوں اے لبزانی بدل کنگا چُش که مئی بلوچ راج، اِشانی جاهادروت و دراهبات گوشیت هچ ثوابے کٹَّگ نبیت

کارے که برابر گوں شرعا مبیت بے ثواب انت چُش که جابربن سُلیمَے سلاما.

دومی منانک: ماں دعایے که وپسگَے وهدا وانگ بیت، اے دعایا رسول الله (صلی الله علیه و آله و سلم) یکے چه وتی صحابیان یاد دات.

رسول الله (صلی الله علیه و سلم) آئیا اے ڈول یاد دات: که ماں دعایا بگوشیت: آمَنتُ بِکِتابکَ الّذی انزَلتَ و نبیِّکَ الذی ارسلتَ.

بلے دومی رندا که اے صحابی آتک و اے دعایی رسول صلی الله علیه و آله و سلمَے دیما ونت آئیا نبی یَے (و بنبیک الذی ارسلت) جاها گوشت: و بِرَسُولک َالذﻱ ارسلت.

هما دمانا رسول الله(صلی الله علیه و سلما) آئی ردی گپت و گوشتی: بگوش: وبنبیک الذی ارسلت.

دلگوش: اے ماں حالے که رسولَے جاه و مقام چه نبیا بالاتر و گهترانت، بلے مئی پیغمبرا گوشت: رسول مگوش، بلکیں هما چیزیا بگوش که من ترا یاد داتگ.

پرچا آ گال و لبزانے که ما په وتی لیکه و خیالا چه هر چیزے گهتر زانیں چه رسول الله(صلی الله علیه و آله و سلمَے) گوشتگیں گفتاراں شَرتِر و گهتر بیتّ نکنَنت
اے بابتا لازم انت که ما شرعَے تچکیں رهبندَے رندگیریّا بکنیں و سلامَے بدلا دروت و دراهبات کارمرز مکنیں تُری که په مئی خیالا اے شرتر و گهترانت.