سنت آنلاین

امام ابوحنیفہ رحمہ اللہ چہ وتی دست رنجا وارتی، ٹیکی و جایزہ یانی قبول نَکُت، حسن بن زیاد رحمہ اللہ گوشیت: اللہ پاکَے سَوگَنداِنت کہ امام ابوحنیفہ رحمہ اللہ چہ ھِچ حاکم و اَمیرے ٹیکی و جایزہ قبول نَکُت.

منصور(خلیفہ عباسی) سِی ھزار دِرھم چَند بَرا پہ امام صاحبا دیم دات، وھدے کہ امام صاحبا دیت کہ دیما دیم حاکمَے ٹیکیاں رد کُت نَکَنت؛ پگرے جَتی و گوشتی: اَے بادشاہ! مَن بغدادا غریبیں مَردمیاں! و مَردُمانی اَمانت مَنی گورا ایر اَنت،‌و مَنا جاھے نَھِنت پہ انچو اَمانتَے ایر کَنَگا، اے بابتا مَردمانی اَمانتان ماں بیت المالا ایر بِکَن! مَنصورا قبول کُت.
وھدے کہ امام صاحبا وفات کُت؛ مَردمانی اَمانتان اِش چہ بیت المالا دَر کُتَنت، اَنا گَتا دیت اِش کہ آ سِی ھَزار دِرھَم ھَم اَمانتانی ھَواراِنت، مَنصورا گوشت: ابوحنیفہ رحمہ اللہ مَنا فریب داتَگ.

مَنصورَے لوگبانُک گوں مَنصورا اے بابتا کہ عدالتا ھیالدارے نَکَنت، جیڑہ کُت، و چہ مَنصورا عدالتَے لوٹوک بوت، و پدا راضیگ بوت کہ امام ابوحنیفہ آیانی میانا فیصلہ بِکَنت. گُڑا مَنصورا امام صاحب لوٹائینت، امام رحمہ اللہ پَردَگَے پُشتا نِشت ماں حالے کہ مَنصور گوں وتی لوگبانُکا دیوانَے توکا نشتَگَت.
منصورا گَپ بُندات کُت و گوشتی: پہ مَردیں آدما چَند جَنَے گِرَگ رَوا اِنت؟
امام رحمہ اللہ ء گوشت: ۴ جَنیں.
پدا جُستی کُت: چہ اندازہ مولِد و کَنیز؟ امام صاحبا گوشت: ھَر چِنکہ کہ بلوٹیت.
پدا مَنصورا گوشت: آیا جایزاِنت کہ کسے چہ اے گپا دگہ گپے بگوشیت؟ امام صاحبا گوشت: اِنّا.
گُڑا مَنصورا وتا کامیاب لیکِت و وتی لوگبانُکا گوشتی: شَر گوش بِدار و بِچار کہ امام ابوحنفہ رحمہ اللہ چے گوشَگ اِنت؟!
وھدے کہ امام صاحبا اے پَیم دیت گوشی: البت اے اندازہ جَنَے گِرَگا اللہ تعالی پہ مُنصف و عادلیں مَردُماں جایز کُتگ؛ اگہ عدالت کنوکے مَبیت گڑٍا یک جَنے گِرَگ بس اِنت، ھما پَیمے کہ اللہ تعالی وت گوشیت:{فَاِنْ خِفْتُمْ اَن لَّا تَعْدِلُوا فَوَاحِدَۃ} بزاں: اگہ شما را اے تُرس ھست کہ عدالتَے ھَیالداریا کُت نَکن اِت بیشک کہ یک جَنے کِرَگ بس اِنت. اے بابتا مۓ سرا لازم اِنت کہ گوں اللہ پاکَے آداباں وَتا اَدَب بِکَنیں و چہ آیاں دَرس بِگِریں.
اے وھدی مَنصورر ساکِت بوت،گُڑا وھدے کہ امام صاحب چہ داورے دیوانا دَر بیت، مَنصورَے لوگبانُکا ھما دَمانا مَزَنیں تحفہ و ٹیکی یے پہ امام صاحبا دیم دات.
امام صاحبا ٹیکی قبول نَکُتَنت و گوشتی: مَن چہ اللہ پاکَے دینا پلامَرزی کُتَگ، نہ اے واستا کہ یکے گوں وتا نزّیک بِکَناں و نہ پہ دُنیایَے لوٹَگا.

📗الخیرات الحسان فی مناقب الامام الاعظم ابی حنیفه النعمان