سنت آنلاین

تاسوعا و عاشورا محرّم ماہَے دو نام کپتگیں روچ اَنت، بزاں محرمَے نھمی روچ و دھمی روچ؛
عربی زبانا نُہا تسع گوش اَنت و دہا عشر گوش اَنت نوں تسع و عشر محرمَے نھمی و دھمی روچَے نام بندگ بیتگ.

عاشورا ئے پشدر پیش چہ اسلاما اِنت درور مھتر موسی علیہ السلام ھمے روچا چہ فرعونَے دستا پاکیں اللہ ئا رکّینْتگ.
دگہ بازیں انچیں جاور پیش چہ اسلاما اے روچَے تھا بیتگ اَنت.
و واجہ نبی صلی اللہ علیہ و سلما ماں مدینہ شریفا یھودی دیست اَنت کہ ھمے روچا روچگ بیگ اَنت گڑا واجہ نبیا گوشت کہ: ما چہ یھودیاں پہ مھتر موسی حق دارترایں کہ روچگ بہ بہ ایں و عاشورائے روچگ پیش چہ رمضانَے روچگَے فرض بیگا فرض بیتگ رندا گڑا واجہ نبیا مردم گوشت اَنت کہ: روچگ دار اِت اگاں ندار اِت شما مستر وت اِت.

بلے! بزان اِت کہ اے روچگَے مُز و بدل باز اِنت بس اے گپا دلگوش کن اِت کہ ھرچ مردمے روچگ دار ایت گڑا دو روچگ بدار ایت نھمی و دھمی روچاں بدار ایت یا دھمی و یازدھمی روچاں بدار ایت دانکہ گوں یھودا ھمرنگ مہ بیت چیا کہ یھود بس دھمی روچا روچگ دار اَنت.
دگہ یک پاک گشتانکے ھست اِنت کہ واجہ نبی صلی اللہ علیہ و سلما گوشتگ: ھرچ مردمے محرمَے دھمی روچا پہ وتی لوگ مردماں و جن و چُکاں چہ اے دگہ روچاں گیشتر و شرتریں ورگ بہ وارین اِیت و آیاں اے روچا تنگ مہ کنت پاکیں اللہ آئی روزیگ تھا برکت دنت.
و ما اگں تونیں دوئیں کاراں بہ کنیں روچگ بدارایں و دَبّوج و بانگواھا شریں وراک بہ ورایں و کسانیں چکاں اے روچا گَل بہ کنیں.

و محرم ماہا وترا جَنَگ و چوپگ و سیاہیں گُد گْورا کنگ اے شریں کار نہ اِنت اسلاما ما را چہ اے کاراں مکن کتگ، نہ بس محرما بلکیں عُمرَے پھکیں روچاں پہ مسلمان شر نہ اِنت؛ پُرس بس سہ روچ اِنت گیشتر شر نہ اِنت.

و لھتے گوش ایت کہ محرما سیر و سانگ مہ کن اِت، اے ھبر و لیکہ رد اِنت اسلامَے تھا چشیں رھبندے نیست اِنت.