سنت آنلاین

وهدے که دنیائے تها شرک و کفر و ظلمَے آس جمبلاس بیت هر هشک و تر ماں آئی گرمیا سُچان‌ات و پیسریگیں پیامبرانی آ‎ؤرتگیں دین و شریعت اوباشانی واهگ آماچ بیتگ‌ات، انچوش‌ات که انسانی بستار چه بازیں غیر پرستیا بیگواه به بیت.
اے وهدی الله تعالی وتی لا‏ئقیں پیامبر بزاں حضرت محمد په راهشونیا درچت و آئی هزمتکاریا مَزن همّت و مَلّیں مترسیں صحابه گچین کت‌انت په درور حضرت عمراِنت که آئی بابتا اے نبشتانکا چم شانکے دیگی‌انت:

 نام: حضرت عمر،
پتَے نام: خطاب،
لقب: فاروق،
کنیت: ابو حفص
پیدائش: سیزده سال رند چه عام الفیلا

حضرت عمر مسلمانانی خلیفه بَیگا پد په اسلاما بازیں کارے کتگ که لهتیں چه آیاں ادا گوشگ بیت:
هجری سالَے چاردهما دمشق ، حمص، فحل، فتحی کتگ‌انت و همے سالَے تها مسلمان په بیست رکعت تراویحا یک جاه کتگ‌انت.
و همے پیما ملک فتح بیان و اسلام مں کوڈهیں دنیائا شنگ و تالان بیان‌ات داں که بیست و سیمے سالِ هجریا مکران، اسلامَے منگا تیار بیت بے کشت و کوشا بلوچ مسلمان بوت‌انت .

 واجه‌َے همدردی:
یک رندے عربستانَے شبه جزیره ڈکالیا ماں پوشتگ‌ات دَاں ۹ ماها هشکیں زمینَے تلنکاراں هور ترمپے نه رتک.
اے ڈکالا گوشَے سجئیں سرزمین سوتکگ‌ات مردم حضرت عمر پانگا اتکنت وتی درداش پدر کت‌انت خلیفه رضی الله عنه سک پریشان بیت همے ڈکالَے وهدا واجهَے گورا کمے روغنی نگن آرگ بیت واجها یک دهاتی مردمے سلاه جَت که بیا بور آمردا یک دابے ورگا شروع بیت که گوشَے دیر انت چشیں ورگی نه دیستگ.
پمیشکا خلیفه ئاجُست کت: که تو منی هیالا چشیں ورگ دیر اِنت دانی نه وارتگ؟ مردا پسو دات: که هو! من هچ کسا چُشیں نانَے ورگا نه گندگایاں حضرت فاروقا سوگند یاد کت که من چُشیں ورگ نه وراں داں مسلمان چه اے جاورا به رکّّ‌انت، رندا خلیفه چه وتی مملکتَے آدگه میتگاں په مدینه ئے مردماں گندم ، آرت، روگِن لوٹاینتی.

سیاست:
حضرت عمرا په مردماں گوشت: من شمارا سیم‌سرانی پاسبانیا باز نندیناں و هر وهدے که یکے چه شمارا لوگا مه بیتیں پتَے جاها په آیاں پهکیں بند و بستا کناں.

دومی خلیفه ئے فضیلت:
۱ـ امام بخاری چه پیامبرا روایت کنت واجها فرمائینتگ: (لقد کان فیما قبلکم من الامم محدثون فان یکن فی امتی احد فانه عمر ت)
بزانت: پیسریگیں امّتانی تها انچیں مردم بیتگاں که په آیاں حقایق الهام بیتگ که منی امتَے تها اگاں چُشیں هست‌انت گڑا آ حضرت عمرانت.

۲-پیامبرا فرمائینت: “لوکان بعدی نبی لکان عمر بن الخطاب” (ترمذی وحاکم)
بزانت: اگاں چه منا پد پیامبرے به بیتیں آ عمر بن خطاب بوتگ‌ات .
واجهَے بابتا فضیلت بازانت بلے من همینچکا بس کناں.

حضرت فاروقَے لهتیں پنت:

۱٫ تفقّهوا قبل ان تسودوا: چه سرداری رسگا پیش، علما یاد بگرِت.
۲٫ من ذهب حیاه مات قلبه: کسے که غیرتی بروت آئی دل مرایت.
۳٫ من کثر مزاحه قلّ حیاه: هر کسے باز مزاک به‌کنت آئی شرم و حیا کم بیت .
حضرت عمرَے شهادت:
حضرت عمرا دعا کتگ‌ات : ” اللهمّ ارزقنی الشهادة فی سبیلک وفی بلد نبیک”
بزانت: اےالله منا وتی راها و وتی نبی میتگا شهیدی نصیب به‌کن ‌‍
الله تبارک و تعالی واجهَے دعا مستجاب فرمائینت.
هجری قمری بیست سیمی سالَے ذی الحجّه ئے بیست و هپتمی روچا ابو لولو مجوسیا گوں وتی زهر وارتگیں کاٹارا ٹپیگ کت و هجری قمری بیست و چارمی سالَے محرّما که یکشنبه ئے روچ‌ات شهید بوت .

رضی الله تعالی عنه و عنهم و عنّا معهم اجمعین.

اسماعیل پیش بهار

سرچمگ:
۱٫ شیخین:خطیب عبدالرحیم
۲٫ خلفاءراشدین: شیخ محمّدعلی خالدی