سنت آنلاین

 در اول حمدِ مالکِ المُلکِ سرمدی
ذات سبحانا زیب دنت شانِ واحدی
داتگی چرخِ اخضرا شکلِ گنبدی
آئی تقدیرَے پنجگین نیکی و بدی
من کناں نعتِ اَحمد و آلِ اَحمدی
پر رَسالتا دائما کاراں شاھدی
چار یار پاکیں ھادی و دینَے مھتدی
شاہِ جیلانا بر سر اِنت تاجِ مُرشدی
خطّ کشّاں بر سادئیں برگے کاگدی
غافلیں مرداں دیاں سوج و سرپدی
عاقل و دانش پروراں عقل و ھوش کن اِت
مئے نصیحت و برادری پنداں گوش کن اِت
ساھتے نند اِت یک دمانے خاموش کن اِت
شر بچار اِت از نوبتِ حضرت آدما
شیث و اِدریسا تا کہ سردارِ عالما
کوڑوئیں غدّارا وفا بیتگ مردما؟
چیر چِت اَنت دھرِ فانیا ماگونیں رَما
شر ھما اِنت کہ نئی بورین فردایَے غما
رہ خطرناکیں، توشگے زیریں دل جما
قصّھے وَشّیں خاطروں تَرّ اِیت دائما
بیا اِت بیلاں کہ قصہا کاراں گوں شما
اِے جھانا گر ھرکسی خاطر شاد بیت
عقل و اِدراکا از فلاطون زیاد بیت
دانش و ھوشا اسفلینوسَے سیاد بیت
قُوّت و زور و زھرگا چو فرھاد بیت
طالع و بخت و دولتا چو بھزاد بیت
چندنیں بُرج و ماڑیان دل آزاد بیت
جانگَزیں مرکَے پنجگاں آخر کاد بیت
مارا چو پیشیگین تواریخاں یاد بیت
اِے روایتاں گر ستر نیست اِنت اعتبار
از مثالا پند گر اَنت مردِ ھوشیار
شامَے اَطرافا در حدودِ مغرب دیار
حضرتِ عیسیٰ یا، کپیت یک جاھے گذار
گندی کہ کپتگ کلّہ اے بر روےِ ڈگار
ھورتی چاریتی حضرت بہ چشمِ اعتبار
کُھنہ کانپولے ریز اِتگ پر گرد و غبار
پاک پیغمبر عرض کنت پیشِ کردگار
یا الھی کہ تو وتَے حیُّ پایدار
کلّہ ئَے رازا تو بکن گوں من آشکار
آتکگ چہ غیبا حضرتَے گوشاں اِے توار
کلّہا حکمن کہ پر تئی جوابا بیت تیار
حضرتا چُستا پِر کُتگ کانپولا صدا
تو کَے خاکاں کپتگ ئے بیچارگ اِدا؟
جنس مردانے یا جنینانی ھم رِدا؟
دورِ دنیا یا بیتگ ئے شاھے یا گَدا
بیا وتی ناما کن منا معلومدار اِدا
حکمتِ زور و قدرتِ پاکیں صاحبا
کلّہا گْوشتگ بے دپ و روح و قالبا
السّلام یا عیسیٰ نبی اللہ مرحبا
گَپّ منی باز اَنت گوش بدار اصلی مطلبا
من سراں سلطان جم جمی خوار و مستمند
مغربَے تختا بیتگاں شاهِ سر بلند
غافل و مغرور و ستمکار و خود پسند
قیصرَے تاجؤں گون اَت و کسرائَے کمند
چھار صد سالا نشتگاں بے رنج و گزند
من نہ گپتگ چہ عاقلاں نیکین سوج و پند
آبری ڈیلوں مرگَے اندیشا بے غم اَت
ناموں مہ دھرا مردورین سلطان جُم جُم اَت
بختوں پر زور و رعیت و راجوں سرجم اَت
دہ ھزار ورنایون قزلباشیں خادم اَت
تختَے دیما بہ خدمتا چست و قائم اَت
فوجوں چو مُرغا و ماھی و مورا رَم رَم اَت
دشمناں دائم مویہ و مَرگے ماتم اَت
ھر صباح لیبوئیں ھوسناکاں ھَم ھَم اَت
دستوں بر خوار و بزگراں دستِ حاتم اَت
لنگر و شاھی مُبدھوں وقفِ عالم اَت
مایہ ئے عیش و عشرتا مئیگا چے کم اَت
دو ھزار مھرنگیں جنوں بیل و محرم اَت
وقت و نا وقتا خلوت و خاصیں ھمدم اَت
چینی رقاصاں مجلسا ناچ و زمزم اَت
چار ھزار دختر چینی مھرنگیں کھربا
خوش قَد و خوش لفظ و دلارام و دلربا
خدمتا ھر وقت حاضر اَت بیگاہ و صبا
آدُریں دنتان ، قرمز و یاقوتیں لباں
چَلّہ و فیروزہ گونا دستِ سنگھان
آ طلا کاریں باھیگ گوں پادَے ھلھلاں
چل ھزار تردّوکیں کُمیت فیلی دورواں
صد ھزار سالونکیں نواب جنگی پھلوان
گوں زھر و زھراب نیزہ بلّیں خود و کمان
بُرز منا کوٹ و بُرز منا زرّیں کبھاں
من بسے دشمن ژند کُتگ سانڈی دکّھان
دور دنیایا بیتگاں عالی ھمتے
حُکمرانی اوں کُرتگ اَت تا کہ مدتے
از خداوندا بیتگاں اَندر غفلتے
سجدہ اوں کُرتگ وجہ نادانی یک بُتے
نہ بیتگوں دنیایا غم و رنج و محنتے
کُلگّ و پشانک و تپ و رنج و زحمتے
آخر العمرا گرد اِتگ نوکیں نوبتے
یک اناگاہا زُرت منی جانا علتے
آتکگ اَت موت و سختی و گرانیں شدتے
نیلگیں چرخا زُرتگ اَت لیٹ و حرکتے
ملکموت نازل بیت پہ صد بیم و ھیبتے
گوں گروھیّا با عجب شکل وصورتے
یا نبی اللہ مَنّ اِتوں بازیں رشوتے
لوٹ اِتوں چہ مرگَے آفتا موہ و مھلتے
داتگی چَمّ سُھرے منا گرّ و دھشتے
تو نزانَے کہ حالقا نیست اِنت حاجتے
روحی قبض کُرتگ پر حسدّی و دکّتے
نوش اِت من ناکامیں دلے زھریں شربتے
بادشاھی اوں ھچ نہ بیت پشت و پارَتے
اِے منی تاجداریں سر اِنت کپتگ عبرتے
تو بہ چہ سختیاں کہ من قبرا دیتگ اَنت
چا عذاباں کہ برزخَے توکا بیتگ اَنت
پھلیگ چہ پھلیگَے شما ڈنا گوستگ اَنت
دوزخَے جوشا مغز سرَے توکا گرستگ اَنت
گرمیں غِسلیناں جگر لاپا سستگ اَنت
گاھے من اندوه و غماں گریان بیتگاں
گاھے من غرقِ ھنگری چولاں بیتگاں
گاھے چو مُرغا آسنیں سیھاں بیتگاں
گاھے من جمبوریں جلاں بریان بیتگاں
گاھے من دستِ سکّ دلیں دیھاں بیتگاں
گاھے من گُرز و زیرّ و انبراں بیتگاں
گاھے من زیم و زھرکنیں گرّاں بیتگاں
مدتے دیریں وادیِّ غضبان بیتگاں
در سقر خوار و زار و سر گرداں بیتگاں
حضرتا گْوشتگ اَے غضب کشّیں خاک سَر
دئے منا حال چہ وادیِ غضبانا خبر
عرضی کُرتگ کہ یا نبی اللہ نامور
وادیِ غضبان نام یک جویے در سقر
چائی گرمیا آپ بَنت در لاپا جگر
آ نہ اِنت جاہِ حیلہ و ٹگی و ھُنر
مار و کژدمب و اَژدھا زنڈیں سر بسر
گر جَن اَنت دنیایا دمے بیت زیر و زبر
زَھر و زقوم و لوھڑ و موج اَنت بے قَدر
گر ھزار سالا من کناں توصیفا سَتر
اَز منی توصیفا ھما دیم اِنت بیشتر
عرض منی اِیش اِنت حضرت عیسیٰ نامور
عرض بکن تو گوں بادشاہ رَبُّ البشر
پر منا بخشی از وتی رحمّتاں نظر
گنداں دنیایا نوبت و باریگے دگر
کاراں ایمان و باں خلاص از نارِ سقر
من بسے دیتگ دوزخا تکلیف و ضرر
سُجدہا کَپتگ حضرت و لگّ اِت زاریا
یا الھی کہ تو وت خبردارَے ساریا
چہ وتی پاکیں رحمّتانی غفاریا
جمجما آزاد کن چرے رنج و خواریا
نوبتی دنیائی بدئے ، دور ءُ باریا
ھِمت و توفیقی بدئے نیکو کاریا
از خداوندِ قدرتِ رَبّ العالمین
دیر نبیتگ کہ آتکگ جبرئیلِ امین
وحی آرتگ چہ جانبِ رَبُّ العالمین
یا نبی صد لکّیں سرا بردار اَز زمین
دں دو چِل سالا جمجما عمر اِنت بعد اَز این
جمجما جَہ جَت حکمتِ خلاقِ مبین
السّلام یا عیسیٰ نبی اللہ آفرین
جزم زاناں کہ لاالہ الا اللہ یقین
حضرت روح اللہ تو ئے پاک و برگُزین
یا الھی بہ حرمتِ ختم المرسلین
رحمے بہ عبداللہؔ بکن در دنیا و دین

شاعر: مولانا عبداللہ روانبُد پیشّنی