سنت آنلاین

یکّے چہ نمازَے شرطاں طھارت انت و اے بابتا کہ طھارت چہ نمازا پیسر انجام گیرت اول چہ نمازا، طھارتَے احکام بیان بنت.
طھارت سَے بھرانت:
۱-وضو.۲- غسل. ۳- تیمم.
وضو<چاراندام>
وضویَے فرضاں چار دانگنت:
۱- دیمَے شودگ چہ اے گوشَے چلِتکا داں آ دگہ گوشَے چلتکا و چہ جاھے کہ سرَے مود رُدانت داں چیر زَنوکّا.
۲-دستانی شودگ گوں سُروشُکاں.۳-سرَے چارکا مسحَے کَنَگ. ۴-پادانی شودَگ گوں شیلانچُکاں.
دلگوش : چہ اے چاریں چیزاں اگہ مودی سر ے اندازگا خُشک بمانیت وضو نبوتَگ.
وضو سُنّتاں
۱-وضویَے گرگ گوں نیتا بُندات ببیت، اے وڑا نیت بکنت کہ پہ نمازَے وانگا وتا پاک کناں. ۲- وضویَے اول سرا بسم اللہ، گوشگ.۳- دستانا گوں بَنداں داں سَے رندا شودَگ. ۴- سَے رندا مسواکَے جَنَگ.۵- دپا سَے رندا گوں نوکیں آپا گُلگُل کَنَگ. ۶- پُونزا سَے رند گوں آپا شودگ و آپانا ھِیشت کَنَگ. ۷- بَزیں ریشانی آپَے جَنَگ، گوں چَنگُلاں. ۸- دست و پادانی چَنگُلانی میانجیا آپ، جَنَگ. ۹- دست و پاد و دیما سَے رندا شودَگ. ۱۰- یکرندے درا‏ئیں سرا آپ جَنَگ. ۱۱-چہ سرَے آپَے جَنَگا رند، گوں ھما دستانی تَرّیا گوشانی آپ جَنَگ. ۱۲- گوں ھما ترتیبے کہ ماں وضویَے آیتا آتکگ وضو گِرَگ. ۱۳-وضویَے گِرَگَے وھدا اعضایانی لَگاشَگ.۱۴- وضویَے اعضایاں پُشت سر ھم زُوتّا زُوت شودَگ.
۱۴-وضویَے تمام بِیَگا رند اے دعایَے وانَگ: اَشْھَدُ اَنْ لّااِلٰہَ اِلَّا اللّٰہ وَحْدَہ لَا شَریْکَ لَہ وَ اَشْھَدُ انَّ مُحَمّداً عَبْدُہ وَ رَسُولُہ؛ اَللّٰھُمَّ اْجْعَلْنیْ مِنَ التّوّابِینَ وَ اْجْعَلنِیْ مِنَ اْلْمُتَطَھِّریْنَ.
وضویَے تَھراں
وضو سَے بَھر اِنت: ۱- فرض: بے وضو بِیَگَے وھدا پہ نمازا وضو گِرَگ. ۲-واجب: کعبۃ اللہ شریفَے چاگردَے وھدا تُرّ وَرَگ(طوافَے کَنَگ) ۳-مُستحب: وابَے وھدا وضو گِرَگ.
وضویَے پُروشوکاں
وضویَے پروشوک ھفت دانَگَنت:
۱-ھر چیزے کہ چہ دیمی و پُشتی راھا دَر بِبیت وضو پُرشیت.
۲-ریم و خونے کہ چہ بدنا در بیئیت.
۳- گوں دپَے پُرّیا شانَگ.
۴- وابے کہ انسان چہ وتا بے وت کَنت، بزاں انسان چہ وت بے خبر بیت، ھنچو بوپسیت کہ آئی نِشتنی گوں زمینا مُھر مہ بیت.
۵-بیھوشی.
۶- گنوکی.
۷-بالِغیں مردمَے کَندَگ ماں کاملیں نمازے، بزاں ماں نمازے کہ رکوع و سجدہ آئیا مان انت. پدرور: پنچ وھدَے نماز.

سرچمگ: بلوچی فقه