سنت آنلاین

پادا او یَلیں ورْنا !
شَپ گوستگ بزاں روچ اِنت
نی روچ اِنت ، نی روچ اِنت

بیا بیا کہ تئی بختا
شاه شُت گوں وتی تختا

یلدے نی جَڑیں هِرّ ا
تو گْومَس و چِشیں رَهتا

بیا سُهب و سمین گْوات اِنت
دنیا و جهان شات اِنت

تو وَپتَگ و وَژواب ئے
بـے واب تئی بْرات اِنت

بیا دُژمنَے قبرا ، گوں
دستانِ وت کوچیں
نی روچ اِنت ، نی روچ اِنت

پادا او یَلیں ورْنا !
شَپ گْوستگ بزاں روچ اِنت

نی مُرگاں تَوار زُرتَگ
نی موراں نِدگ گون اِنت

نی گوانزَگی طفلاں هم
گِرّے پہ گِلگ گون اِنت

یل دے نی گَر و ژیِمبّاں
کوهاں کہ رُجگ زُرتگ

کوه بندیں کَلات پْرشت اَنت
جُمپاں هم بُرگ زُرتگ

بیا سَنگراں جَورانی
انگار دئیں سوچیں
نی روچ اِنت ، نی روچ اِنت

پادا او یَلیں ورْنا !
شَپ گْوستگ بزاں روچ اِنت

نی شاه نَہ بیت شَهوکار
نی دُز نَہ بنت سَردار

میرانی نگورپانا

نی جَت نَہ بیت بیگار
نی گار نَہ بیت گورُم

نی وار نَہ بیت تورُم
نی آس چَرَے مُرتگ

نی روک نَہ بیت کورم
بیا بیا کہ تئی دُژمن

پہ مَرگا دو کُلکوچ اِنت
نی روچ اِنت ، نی روچ اِنت

پادا او یَلیں ورْنا !
شپ گْوستگ بزاں روچ اِنت

داں زابُل و سیستانا
البرز داں کِرمانا

تئی رُستم سُهراباں
جان دات پہ سَراوانا

تئی راها گُلیں سَند اِنت
یا سَولیں کَسرکند اِنت

بمپُور داں سَربازا
داں هیت تئی هَند اِنت

آگاه بئے یَلیں سارباں !
منزل تئی پَنّوچ اِنت

نی روچ اِنت ، نی روچ اِنت
پادا او یَلیں ورْنا !
شَپ گْوستگ بزاں روچ اِنت

لوٹ ئے کہ بَرئے باجا
سَرجم کن وتی راجا

بِل شاهَے سَر و سوجاں
گار اِنت گوں وتی تاجا

تئی قوم بَلاه زیر اِنت
تئی راج جهان گیر اِنت

ملّا تئی همراه اِنت
دهقان تئی میر اِنت

بِلّ گْوالَگ و هُرجیناں
بیا کامب و کَتِل دوچیں

نی روچ اِنت ، نی روچ اِنت
پادا او یَلیں ورْنا !

شَپ گْوستگ بِزاں روچ اِنت
نی روچ اِنت ، نی روچ اِنت

لچّہ کار: جی آر ملّا