سنت آنلاین

اگہ نجاستے یا خون داریں دلوتے ماں چاتا بکپیت چاتَے آپ پلیت بیت.گوں چاتَے آپَے کَشَّگا چات پاک بیت.
چاتَے آپَے کشگ سَے وڑاِنت: بیست ڈول، چِل ڈول، درائیں چاتَے آپَے کشگ
اگہ ماں چاتا دلوتے چُش کہ مُشک و جِنگا یا اِشانی درورے بکپیت و بمریت بیست ڈول آپ اندازئیں چہ چاتا کَشَّگ ببیت داں چات پاک ببیت.
اگہ دلوتے چُش کہ کوتر و پِشّیّا ماں چاتا بمریت چِل ڈول آپ چہ چاتا کشّگ ببیت.
آگہ ماں چاتا انسانے یا کہ پَس و بُزے بمرایت پَھکیں چاتَے آپ کَشّگ ببیت، ھمے پیما اگہ مُرتگیں دلوت ماں چاتا پُوسّ اِت و ٹُکّر ٹُکُّر بوت تمامیں چاتَے آپ کَشّگ ببیت.
گوں چاتَے پاک بِیَگا ساد و ڈول و کَشّوکَے دستاں ھم وتا وت پاک بَنت.
نجاستانی بیان
پلیتیانے کہ دوری کنگ چہ آیاں لازم انت چند بھر اَنت:
۱-ھرچ چیزے کہ چہ انسانَے بدنا درکیت، وضو یاغسل لازم بیت، نا پاک انت، چُش کہ پیشاپ، لانک بوج،ودی<اسپیتیں آپے کہ چہ پیشاپا رند کَیت و کمّے لَچناک انت> مذی<اسپیتین و لچناکیں آپے کہ وپت و وابا پیسر چہ مردیں آدم ءِ دیمی راھا کیت > مَنی<ھما ناپاکین و بد بوئیں آپ کہ وپت و وابا رند کیت “شَھوَت”>
۲-خون، ریم و زرداپ کہ چہ وتی جاھا کمے بِرُنبَنت.
۳-شانَگے کہ دپا پُر بکنت.
۴-ھر آ چیزے کہ چہ دلوتان و چارپادانی بدنا درکیت چُش کہ پیش آپ و لِڈّا نا پاک و نجس انت.
۵ -ھما مرغانی لِڈّ کہ گوشت اش حرام انت.
۶-کُچِکّ و خوکَِ سرارگ، ھمے پیم آ دلوتانے کہ گوشت اش حرام انت، شیر و سرارگ و گوشت اش ھم نجس انت .
۷-شراب و نشہ کنوکیں چیزاں.
۸-دلوتے کہ مُردار بوتَگ.
۹-حرامیں مُرغانی گوشت.
نجاست دو بهر انت: حقیقی و حکمی
۱-نجاست حقیقی: هما ظاهریں نجاستے انت کہ گِندگ بیت، چُش کہ پیشاپ و خونا.
۲-حکمی ھما انت: کہ گِندگ نبیت، بلے شریعتا گوشتگ نجس انت چُش کہ بے وضویی و جُنُبی کہ بے وضویی <حدث اصغر> و جُنُبی<حدث اکبر> گوشگ بیت.
نجاست حقیقی دو بھر اِنت:
۱-غلیظہ: ھما انت کہ گوں مُھر و محکمیں منانکا ثابت بوتگ و ماں آئی نجس بیگا ھچ وڑیں اختلافے نیست، چُش کہ خون و شرابا.
۲-خفیفہ: ھما انت کہ ماں آئی نجس بیگا روایات دگہ دگر اَنت کہ چہ لھتے نجس بیگ و چہ لھتے پاک بیگی زانگ بیت بلے ناپاک بیگَے روایات گھتر زانگ بوتگنت، چش کہ اَسپَے پیشاپ.
نجاست غلیظہ اگہ درھمے اندازگا ببیت معاف انت. نجاست خفیفہ اگہ چہ گُد و پُچّ و جانَے چارکا کمتر ببیت معاف انت.
دلگوش: درھم، دستَے دلگَے اندازھا اِنت.

سرچمگ: بلوچی فقه